ដោយត្រូវការចុះចតជាបន្ទាន់ យន្តហោះមួយគ្រឿងបានបង្ហូរឥន្ធនៈពីលើសាលារៀន (មានវីដេអូ)

អាមេរិក៖ បើយោងតាមសារព័ត៌មាន BBC បានឲ្យដឹងថា យន្តហោះដឹកអ្នកដំណើរមួយគ្រឿងបានបង្ហូរឥន្ធនៈនៅលើទីធ្លាសាលារៀនមួយចំនួន ខណៈពេលវាត្រូវការចុះចតជាបន្ទាន់ នៅអាកាសយានដ្ឋានអន្តរជាតិឡុសអាន់ជឺឡេស។ យ៉ាងហោចណាស់មានមនុស្សចំនួន៦០នាក់រួមទាំងកុមារនិងមនុស្សធំជាច្រើនកំពុងទទួលការព្យាបាល ដោយសារបញ្ហាស្បែកនិងបញ្ហាដកដង្ហើម។ បើតាមច្បាប់អាកាសចរណ៍ចែង ប្រេងឥន្ធនៈអាចនឹងត្រូវបានគេបង្ហូរ នៅក្នុងករណីចុះចតជាបន្ទាន់ ប៉ុន្តែមានតែលើតំបន់ដែលបានកំណត់និងនៅរយៈកម្ពស់ខ្ពស់តែប៉ុណ្ណោះ។

ការហោះហើររបស់ក្រុមហ៊ុនអាកាសចរណ៍ Delta Airlines បានវិលត្រឡប់មកអាកាសយានដ្ឋានវិញ ដោយសារបញ្ហាម៉ាស៊ីន។ បើនៅសាលា Park Elementary School ក្នុងទីក្រុង Cudahy ដែលមានចម្ងាយ២៦គីឡូម៉ែត្រពីភាគខាងកើតអាកាសយានដ្ឋាន អ្នករងរបួសទាំងអស់គឺមិនសូវធ្ងន់ធ្ងរប៉ុន្មាននោះទេ។ 

យោងតាមកាសែត Los Angles Times បានឲ្យដឹងថា ក្មេងៗចំំនួន២ថ្នាក់គឺកំពុងលេងនៅខាងក្រៅ ស្របពេលដែលយន្តហោះបានបញ្ចេញប្រេងឥន្ធនៈពីលើ។ ចំណែកក្រុមហ៊ុនអាកាសចរណ៍ Delta Airlines បានបញ្ជាក់នៅក្នុងសេចក្ដីថ្លែងការណ៍មួយថា យន្តហោះដឹកអ្នកដំណើរបានបញ្ចេញឥន្ធនៈ ដើម្បីកាត់បន្ថយទម្ងន់របស់វា នៅពេលចុះចត៕