គួរឲ្យព្រួយបារម្មណ៍! នៅឆ្នាំ២០១៩នេះ តំបន់អាក់ទិកបានកើនឡើងកម្ដៅគួរឲ្យកត់សម្គាល់ ហើយសមុទ្រទឹកកកដែលអាចជិះស្គីបាន នឹងអាចក្លាយជាកន្លែងហែលទឹកបានវិញ

បរទេស៖ ទឹកកកនៅតំបន់អាក់ទិកប្រៀបបាននឹងម៉ាស៊ីនត្រជាក់សម្រាប់បន្សាបកម្ដៅរបស់ភពផែនដីយើង ហើយវាជួយកាត់បន្ថយកម្ដៅពីព្រះអាទិត្យនិងបានធ្វើឲ្យតំបន់ប៉ូលខាងជើងត្រជាក់ផងដែរ។ ការសិក្សាថ្មីបានបង្ហាញថាវាមិនមែនជាសញ្ញាដ៏ល្អនោះទេ​ ពេលដែលប្រព័ន្ធត្រជាក់នៅតំបន់នោះចាប់ផ្ដើមចុះខ្សោយ ហើយវាបានផ្ដល់ផលប៉ះពាល់យ៉ាងខ្លាំងដល់ជីវិតមនុស្សនិងប្រព័ន្ធអេកូឡូស៊ីដែលមានលើផែនដី។ នៅឆ្នាំ២០១៩នេះខ្យល់ត្រជាក់នៅតំបន់អាក់ទិកមានសីតុណ្ហភាព ១.៩អង្សាសេខ្ពស់ជាងសីតុណ្ហភាពពេលធម្មតា​ ហើយវាជាប់ជាកំណត់ត្រាទី២នៃការកើនឡើងកម្ដៅចាប់តាំងពីឆ្នាំ១៩០០មក។

នៅប៉ុន្មានឆ្នាំចុងក្រោយនេះអ្នកវិទ្យសាស្ត្របានសិក្សាយ៉ាងចិត្តទុកដាក់ទៅលើតំបន់អាក់ទិកនិងឥទ្ធិពលនៃការបំភាយឧស្ម័នរបស់មនុស្សដែលធ្វើឲ្យកម្ដៅនៅជាប់ក្នុងបរិយាកាសផែនដី។ តំបន់អាក់ទិកប្រៀបដូចជាអ្នកគ្រប់គ្រងអាកាសធាតុនៅលើពិភពលោក ប៉ុន្តែបើសិនជាតំបន់នេះមានការផ្លាស់ប្ដូរតិចតួច វានឹងធ្វើឲ្យមានការផ្លាស់ប្ដូរអាកាសធាតុយ៉ាងធំនៅលើពិភពលោក។

លោក Walt Meier ដែលជាអ្នកវិទ្យាសាស្ត្រជាន់ខ្ពស់ផ្នែកស្រាវជ្រាវនៅមជ្ឈមណ្ឌលទិន្នន័យព្រិលនិងទឹកកក និងជាអ្នកនិពន្ធរួមនៅផ្នែកសមុទ្រទឹកកកនៃតំបន់អាក់ទិកបានមានប្រសាសន៍ថាការឡើងកម្ដៅនៅតំបន់ផ្សេងតែប៉ុន្មានអង្សាវាមិនធ្វើឲ្យអ្នកចាប់អារម្មណ៍ប៉ុន្មានទេ ប៉ុន្តែការឡើងកម្ដៅតំបន់អាក់ទិកពី ៣១អង្សាទៅ៣៣អង្សាវាអាចធ្វើឲ្យសមុទ្រទឹកកកដែលអាចជិះស្គីលេងបានក្លាយជាកន្លែងដែលអាចហែលទឹកលេងបានវិញ៕