រាជធានីភ្នំពេញ ៖ តាមសេចក្តីរាយការណ៍បឋមបានឱ្យដឹងថា មានករណីអគ្គិភ័យមួយបានកើតឡើងនៅជាន់ទី១៩ របស់អគារការដ្ឋានសំណង់យីហោ GIA TOWER បង្កការភ្ញាក់ផ្អើលយ៉ាងខ្លាំងដល់កម្លាំងសមត្ថកិច្ច និងរថយន្តពន្លត់អគ្គិភ័យចំនួន៤គ្រឿងចុះមកធ្វើអន្តរាគមន៍ផងដែរ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សហេតុការណ៍ខាងលើនេះបានកើតឡើងកាលពីវេលាម៉ោង១២និង៣០នាទីថ្ងៃត្រង់ថ្ងៃទី១០ ខែធ្នូ ឆ្នាំ ២០១៩ នៅជាន់ទី១៩នៃអគារការដ្ឋានសំណង់យីហោ GARDEN IN THE AIR TOWER (GIA TOWER) ស្ថិតក្នុងទីក្រុងកោះពេជ្រ សង្កាត់ទន្លេបាសាក់ ខណ្ឌចំការមន។
តាមប្រភពព័ត៌មានពីនគរបាលបានប្រាប់ឱ្យដឹងថា មុនពេលកើតហេតុ ពេលដែលក្រុមកម្មករសំណង់ ភាគច្រើនដែលធ្វើការសំណង់នៅក្នុងការដ្ឋានសំណង់ GIA TOWER ដល់ម៉ោងសម្រាកហូបបាយថ្ងៃត្រង់នោះ ក៏មានជាងដែកមួយក្រុមបាននាំគ្នានៅធ្វើការងារផ្សារដែកបន្តនៅជាន់ទី១៩ ខាងក្នុងការដ្ឋានលើ។ ខណៈពេលក្រុមជាងដែលកំពុងតែផ្សារដែកនោះ ស្រាប់តែប៉ុសផ្សារនោះបានឆ្លងចរន្តអគ្គិសនី បណ្តាលឱ្យឆេះខ្សែភ្លើង និងក្តារកុងប្លាកេដែលគេគរទុកនៅខាងក្រោមយ៉ាងសន្ធោសន្ធៅ និងមានផ្សែងខ្មៅហុយឃ្មួញខ្មាញ់តែម្តង។
តាមប្រភពដដែលបានប្រាប់បន្តថា នៅពេលដែលភ្លើងកំពុងតែឆេះខ្សែភ្លើង និងក្តារកុងប្លាកេនោះ ក្រុមជាង និងក្រុមកម្មករសំណង់ក៏បាននាំគ្នារត់ស្រវ៉ាទៅយកបំពង់ពន្លត់អគ្គិភ័យ និងទឹកទៅធ្វើការបាញ់ពន្លត់ផងដែរ ។ ភ្លាមៗនោះដែរក៏បង្កអោយមានការភ្ញាក់ផ្អើលយ៉ាងខ្លាំងដល់ក្រុមកម្មករសំណង់ និងជាងនាំគ្នារត់ចេញមកខាងក្រៅការដ្ឋាន ហើយកម្លាំងសមត្ថកិច្ចមូលដ្ឋានចុះមកដល់កន្លែងកើតហេតុ ព្រមទាំងហៅរថយន្តពន្លត់អគ្គិភ័យចំនួន៤គ្រឿងចុះមកចាំជួយធ្វើអន្តរាគមន៍ផងដែរ តែភ្លើងក៏ត្រូវបានគេពន្លត់ឱ្យរលត់ទៅវិញ ដោយមិនបានប្រើប្រាស់រថយន្តពន្លត់អគ្គិភ័យឡើយ។
ក្នុងករណីអគ្គិភ័យឆេះនៅជាន់ទី១៩ នៃការដ្ឋានសំណង់អគារ GIA TOWER ខាងលើនេះដែរគឺកើតឡើងដោយសារតែឆ្លងចរន្តអគ្គិសនីចេញពីប៉ុសផ្សារដែក ដោយភ្លើងបានឆេះបំផ្លាញក្តារកុងប្លាកេអស់ចំនួន៣សន្លឹក ប៉ុសផ្សារដែកចំនួន១គ្រឿង និងប្រើប្រាស់បំពង់ពន្លត់អគ្គិភ័យអស់ជាច្រើនបំពង់ ចំណែកឯរថយន្តពន្លត់អគ្គិភ័យរបស់ទីក្រុងកោះពេជ្រចំនួន២គ្រឿង និងរថយន្តពន្លត់អគ្គិភ័យរបស់ស្នងការដ្ឋាននគរបាលរាជធានីភ្នំពេញសរុបទាំងអស់មានចំនួន៤គ្រឿង មិនបានប្រើប្រាស់ឡើយ ៕
ប្រភព៖ កោះសន្តិភាព