ភ្នំពេញ៖ ក្នុងដំណើរទស្សនកិច្ចសិក្សាលើទីផ្សារកសិកម្មនៅប្រទេសកម្ពុជា លោក អើនេស្ត ដុមម៉ាហ៊ីណា ឯកអគ្គរដ្ឋទូតប្រទេសស៊ីរ៉ាលីអូន (Sierra Leone) ប្រចាំប្រទេសចិន ក្នុងជំនួបជាមួយ លោក ប៉ាន សូរស័ក្ដិ រដ្ឋមន្ត្រីក្រសួងពាណិជ្ជកម្ម មានគោលបំណងស្វែងយល់ពីទីផ្សារកសិកម្មរបស់កម្ពុជា ជាពិសេសដើម្បីសិក្សាអំពីការនាំចូលអង្ករពីកម្ពុជាទៅកាន់ប្រទេសរបស់លោក។

ក្នុងដំណើរទស្សនកិច្ច របស់ លោក អើនេស្ត ដុមម៉ាហ៊ីណា សិក្សាលើទីផ្សារកសិកម្មនៅប្រទេសកម្ពុជា ក្នុងជំនួបជាមួយ លោក ប៉ាន សូរស័ក្ដិ ធ្វើឡើងកាលពីថ្ងៃទី៤ ខែធ្នូ ឆ្នាំ២០១៩។ លោក បានកោតសរសើរចំពោះការអភិវឌ្ឍរបស់ប្រទេសកម្ពុជា ដែលមានការរីកចំរើនគួរឱ្យកត់សម្គាល់។

លោក បានបន្តថា អង្ករជាអាហារចម្បងរបស់ស៊ីរ៉ាលីអូន ប៉ុន្តែហេដ្ឋារចនាសម្ព័ន្ធកសិកម្មរបស់ប្រទេសស៊ីរ៉ាលីអូនមិនទាន់បានស្ដារបានជាស្ថាពរនៅឡើយ ដូចនេះការនាំចូលអង្ករពីប្រទេសកម្ពុជានឹងពង្រឹងស្ថេរភាពចំណីអាហាររបស់ប្រទេសស៊ីរ៉ាលីអូន។

ជាកិច្ចឆ្លើយតប លោក ប៉ាន សូរស័ក្កិ បានស្វាគមន៍ដំណើរទស្សនកិច្ចនេះ ហើយបានជម្រាបជូនថា ផលិតកម្មស្រូវនៅកម្ពុជាមានចំនួនលើសតម្រូវការប្រមាណ ៤លានតោនជារៀងរាល់ឆ្នាំ ដែលអាចប្រើប្រាស់សម្រាប់ផ្គត់ផ្គង់ជូនទៅប្រទេសស៊ីរ៉ាលីអូនបាន។

ជាអនុសាសន៍លើការងារនេះ លោក រដ្ឋមន្រ្តី បានលើកទឹកចិត្តឱ្យសហគមន៍ធុរកិច្ច ឬក្រុមហ៊ុននាំចូលនៃប្រទេសស៊ីរ៉ាលីអូន ចុះអនុស្សរណៈយោគយល់គ្នាជាមួយនឹងសហគមន៍ធុរកិច្ច ឬក្រុមហ៊ុននាំចេញនៃប្រទេសកម្ពុជា ដើម្បីបង្កើតទំនាក់ទំនងផ្លូវការ និងបង្កភាពងាយស្រួលក្នុងធ្វើពាណិជ្ជកម្មរវាងគ្នា និងគ្នា៕

ដោយ៖ឌីណា

បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected] (3) LINE, VIBER: 098282890 (4) តាមរយៈទំព័រហ្វេសប៊ុកខ្មែរឡូត https://www.facebook.com/khmerload

ចូលចិត្តផ្នែក Khmerhome និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]