ភ្នំពេញ៖ ប្រជាពលរដ្ឋ ២៥៧គ្រួសារ ដែលរស់នៅខេត្តពោធិ៍សាត់ នឹងមានទឺកស្អាតប្រើប្រាស់ ក្រោមជំនួយហិរញ្ញប្បទានឥតសំណងរបស់រដ្ឋាភិបាលជប៉ុន ដែលមានទឹកប្រាក់ ២៤០៥លានយ៉េន (ប្រមាណ ២២លានដុល្លារអាមេរិក)។

លិខិតប្តូរសារស្ពីពី ការផ្តល់ហិរញ្ញប្បទានឥតសំណងរបស់រដ្ឋាភិបាលជប៉ុន សម្រាប់ «គម្រោងពង្រីកប្រព័ន្ធផ្គត់ផ្គង់ទឹកស្អាតខេត្តពោធិ៍សាត់» ត្រូវបានចុះហត្ថលេខា ទទួលដោយ លោក ប្រាក់ សុខុន ឧបនាយករដ្ឋមន្រ្តី រដ្ឋមន្រ្តីក្រសួងការបរទេស និងសហប្រតិបត្តិការអន្តរជាតិ និងផ្ទេរដោយ លោក MIKAMI Masahiro អគ្គរាជទូតជប៉ុន ប្រចាំនៅកម្ពុជា កាលពីរសៀលថ្ងៃទី៤ ខែធ្នូ នេះ នៅក្រសួងការបរទេសកម្ពុជា។

នៅក្នុងពិធីខាងលើ លោក ប្រាក់ សុខុន បានថ្លែងថា ជំនួយប្រមាណ ២២លានដុល្លារអាមេរិក របស់រាជរដ្ឋាភិបាលជប៉ុន នឹងជួយដល់ប្រជាពលរដ្ឋកម្ពុជា ២៥៧គ្រួសារ ក្នុងខេត្តពោធិ៍សាត់ ឱ្យមានទឹកស្អាតសម្រាប់ប្រើប្រាស់ប្រចាំថ្ងៃជាក់ជាមិនខាន។

គម្រោងដែលបានចុះហត្ថលេខាថ្ងៃនេះ ដើម្បីសាងសង់រោងចក្រប្រព្រឹត្តកម្មទឹកស្អាត ដែលអាចផ្គត់ផ្គង់ទឹកស្អាតចំណុះ ៦៦០០ម៉ែត្រគូបក្នុង១ថ្ងៃ និងតបណ្តាញប្រវែង ៨៥,៥គីឡូម៉ែត្រ ចូលផ្ទះគ្រួសារពលរដ្ឋក្រីក្រប្រមាណ ២៥៧គ្រួសារ ដែលរស់នៅខេត្តពោធិ៍សាត់។ ជាការបន្តរបស់រដ្ឋមន្រ្តីការបរទេសកម្ពុជា លោកបានឱ្យដឹងថា ដំណើរការសាងសង់ នឹងចាប់ផ្តើមពីខែវិច្ឆិកា ឆ្នាំ២០២០ ដល់ខែកញ្ញា ឆ្នាំ២០២២។

ស្ថិតក្នុងបរិយាកាសនោះដែរ លោក MIKAMI Masahiro ឯកអគ្គរាជទូតជប៉ុន បានថ្លែងថា ការផ្ដល់ហិរញ្ញប្បទានឥតសំណងនេះ គឺជាការបង្ហាញអំពីការបេ្តជ្ញាចិត្តរបស់រាជរដ្ឋាភិបាលជប៉ុន ក្នុងការរួមចំណែកធ្វើឱ្យប្រសើរឡើងនូវបរិស្ថានរស់នៅក្នុងប្រទេសកម្ពុជា ពិសេសនោះគឺវិស័យទឹកស្អាតតែម្ដង។ កិច្ចសហប្រតិបត្តិការក្នុងវិស័យផ្គត់ផ្គង់ទឹកស្អាត គឺជាវិស័យមួយគួរឱកត់សម្គាល់សម្រាប់រយៈពេលវែង និងទំហំធំតាមរយៈសមិទ្ធផលដែលសម្រេចបានចេញពីគម្រោងទាំងនេះ។ ជាការបន្ថែមរបស់ អគ្គរាជទូតជប៉ុន លោក ថា រដ្ឋាភិបាលជប៉ុននឹងបន្តជួយដល់កម្ពុជាជានិច្ច។

លោក ប្រាក់​ សុខុន បានអរគុណ​ លោក MIKAMI Masahiro និងមន្ត្រីបុគ្គលិកស្ថានទូតជប៉ុន ព្រមទាំងទីភ្នាក់ងារសហប្រតិបត្តិការអន្តរជាតិជប៉ុន (JICA) ដែលបានខិតខំយ៉ាងសកម្ម ក្នុងការលើកកម្ពស់ទំនាក់ទំនងមិត្តភាព និងកិច្ចសហប្រតិបត្តិការកម្ពុជា-ជប៉ុន ឱ្យកាន់តែរីកចម្រើនលើគ្រប់វិស័យ។

គូសបញ្ជាក់ថា ក្រសួងឧស្សាហកម្ម និងសិប្បកម្មបានកំណត់ទិសដៅនៃអត្រាផ្គត់ផ្គង់ទឹកស្អាតឱ្យបាន១០០ភាគរយ នៅគ្រប់តំបន់ទូទាំងប្រទេសនៅត្រឹមឆ្នាំ២០២៥៕

ដោយ៖ឌីណា

បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected] (3) LINE, VIBER: 098282890 (4) តាមរយៈទំព័រហ្វេសប៊ុកខ្មែរឡូត https://www.facebook.com/khmerload

ចូលចិត្តផ្នែក Khmerhome និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]

ចង់ក្លាយជាអ្នកសរសេរក្រៅម៉ោងមានប្រាក់ចំណូលសូមចុះឈ្មោះទីនេះ