ម៉េចក៏ញឹកញាប់ម៉្លេះ! មុននេះបន្តិច រកឃើញសាកសពតារាប្រុសម្នាក់ សមាជិកក្រុម Suprise U!

កូរ៉េខាងត្បូង៖ នៅថ្ងៃទី៣ ខែធ្នូ មុននេះបន្តិច ត្រូវបានគេរាយការណ៌មកថា បានឃើញសាកសព តារាសម្តែងប្រុសលោក Cha In Ha សមាជិកក្រុម SURPRISE U។

តួយ៉ាង បច្ចុប្បន្ននេះ ប៉ូលីសកំពុងតែធ្វើការស៊ើបអង្កេតរកមូលហេតុនៃការស្លាប់របស់ តារាប្រុសរូបនេះ ដោយសារតែព័ត៌មានលម្អិតទាក់ទងនឹងការស្លាប់ ក៏ដូចជាទីតាំង និងពេលវេលាជាក់លាក់ណាមួយនោះ មិនទាន់ត្រូវបានគេទម្លាយឲ្យដឹងនៅឡើយនោះទេ។

គួរឲ្យដឹងថា លោក Cha In Ha បានបង្ហាញខ្លួនចូលជាសមាជិកក្រុមសម្តែង SURPRISE U របស់ផលិតកម្ម Fantagio តាំងពីឆ្នាំ២០១៧មកម៉្លេះ ហើយលោកក៏ធ្លាប់បានបង្ហាញខ្លួន នៅក្នុងខ្សែភាពយន្តខ្លីមួយចំណងជើងថា «You, Deep Inside of Me»ផងដែរ។ ហើយថ្មីៗនេះផងដែរ លោកក៏ទើបតែបង្ហាញខ្លួននៅក្នុងខ្សែភាពយន្តភាគថ្មីរឿង «Love With Flaws» របស់ស្ថានីយ៍ទូរទស្សន៍ប៉ុស្តិ៍ MBC ផងដែរ។

ប៉ុន្តែមិនថាយ៉ាងណា ដំណឹងនៃការស្លាប់របស់តារាប្រុសរូបនេះ បានធ្វើឲ្យប្រិយមិត្តគាំទ្រមានការភ្ញាក់ផ្អើលយ៉ាងខ្លាំង ហើយមហាជនក៏កំពុងតែរងចាំមើលពីព័ត៌មានលម្អិត ក៏ដូចជាលទ្ធផលនៃការពិនិត្យពីមូលហេតុស្លាប់របស់តារាប្រុសរូបនេះបន្តទៀតផងដែរ៕