​អ្នកវិទ្យាសាស្ត្រ​មានការភ័យបារម្មណ៍ ក្រោយរកឃើញសម្រាមចំនួន ១០០គីឡូក្រាមក្នុងពោះត្រីបាឡែនដែលងាប់​

ស្កុតលែន៖ ក្រុមអ្នកវិទ្យាសាស្ត្រកំពុងសម្តែងការព្រួយបារម្ភកាន់តែខ្លាំងអំពីការបំពុលមហាសមុទ្របន្ទាប់ពីមានសម្រាមប្លាស្ទិកជាង១០០គីឡូ​ក្រាម ត្រូវបានគេរកឃើញនៅខាងក្នុងក្រពះត្រីបាឡែនដែល​ងាប់នៅលើឆ្នេរក្នុងប្រទេសស្កុតលែនកាលពីសប្តាហ៍មុន។

សំរាមប្លាស្ទិកដែលគេរកឃើញនៅក្នុងក្រពះរបស់ថនិកសត្វមួយក្បាលនេះរួមមាន ខ្សែពួរ ​សំណាញ់នេសាទ និងកម្ទេចកម្ទីប្លាស្ទិកផ្សេងទៀ​​តដែលបានប្រើប្រាស់ដោយមនុស្ស។

ត្រីបាឡែនទម្ងន់ ២២តោនត្រូវបានគេរកឃើញនៅលើច្រាំងនៃ​​កោះ Harris ដែលស្ថិតនៅភាគពាយព្យនៃប្រទេសស្កុតលែន។ ក្រុមអ្នកត្រួតពិនិត្យនៃដែនសត្វសមុទ្ររបស់ស្កុតលែនបានសម្តែងភាពមិនច្បាស់លាស់ពីការស្លាប់របស់ត្រីបាឡែននិងត្រីដូហ្វីន។

ក្រុមនេះបានសរសេរនៅលើហ្វេសប៊ុកកាលពីថ្ងៃអាទិត្យថា “ នៅពេលដែលយើងទៅដល់ វាបានងាប់អស់រយៈពេល៤៨ម៉ោង ហើយភាគច្រើននៃ​គ្រឿងក្នុងរបស់វាបានផ្ទុះចេញមកក្រៅនៅពេលដែលយើងយកកាំបិតចាក់លើវា” ។ សត្វដែលមានទំហំប៉ុននេះគឺងាយនឹងហើមស្អុយរលួចណាស់ទោះបីជាសីតុណ្ហភាពនៅខាងក្រៅត្រជាក់ខ្លាំងក៏ដោយ ក៏ខាងក្នុងខ្លួនវាមិនត្រជាក់ដែរ។

ក្រុម​អ្នកពិនិត្យលើសាកសពត្រីបាឡែនមួយក្បាលនេះបាននិយាយថា "​វាជារឿងដ៏គួរឲ្យភ្ញាក់ផ្អើល វាជារឿងដ៏គួរឲ្យ​ភ័យបារម្មណ៍ វាជារឿងដ៏​អាក្រក់មួយ" ។

នៅក្នុងពោះត្រីបាឡែននេះមានបរិមាណ​សម្រាមដែលចោលក្នុងសមុទ្រប្រហែល១០០គីឡូ- មានប្លាស្ទិក សំណាញ់ ខ្សែពួរ កែវប្លាស្ទិច កាបូប ស្រោមដៃនិង​សម្រាមផ្លាស្ទិចជាច្រើនទៀត។ រាល់សម្ភារទាំងអស់គឺស្ថិតនៅក្នុង​ក្រពះដ៏ធំមួយរបស់ថនិកសត្វមួយក្បាលនេះ ហើយរបស់ខ្លះមើលទៅហាក់ដូចជាមាននៅក្នុងក្រពះសត្វនេះយូរមកហើយ។

អ្នកស្រុកម្នាក់ឈ្មោះ Dan Perry បានប្រាប់ BBC News ថា  "វាគួរឱ្យសោកស្តាយខ្លាំងណាស់។ វាពិតជាបង្ហាញពីទំហំនៃបញ្ហាដែលយើងមានជាមួយនឹងការបំពុលសមុទ្រ"។

ចំនួនប្លាស្ទិកក្នុងក្រពះត្រីបាឡែនពិតជាច្រើនខ្លាំងណាស់ ហើយ​វាអាចបង្ហាញពួកយើងឲ្យដឹងអំពីគ្រោះថ្នាក់​ដែលមនុស្សបានចោលសម្រាមចូលទៅក្នុងទឹកសមុទ្ រនិងឧបករណ៍នេសាទដែលបាត់ ឬបោះចោល ដែលវាអាចបណ្តាលឱ្យមានគ្រោះថ្នាក់ដល់អាយុជីវិតរបស់សត្វសមុទ្រទាំងអស់៕