ថមមី នឹង​ដឹកដៃ​ភរិយា ទៅ​ក្រេប​ទឹកឃ្មុំ​នៅ​ប៉ែក​អឺរ៉ុប ក្រោយ​រៀបការ​យ៉ាង​អធិកអធម!

(ភ្នំពេញ)៖ ដូចដែលប្រិយភាពបានជ្រាប់មកហើយ នៅរាត្រីថ្ងៃទី២៩ ខែវិច្ឆិកា ឆ្នាំ២០១៩ ជាថ្ងៃមង្គលរបស់តារាចម្រៀងល្បី សួស វីហ្សា ជាមួយនឹងតារាប្រុសលោក ថមមី ដោយមានការចូលរួមពីសំណាក់អ្នកសិល្បៈគ្រប់ផលិតកម្ម គ្រប់ស្ថាប័នទាំងអស់ ជួបជុំគ្នាយ៉ាងកុះករ បង្ករបរិយាយ៉ាងកាន់តែសប្បាយរីករាយ។ តែយ៉ាងណា ក្រោយមង្គលការ លោកថមមី បានបង្ហើបប្រាប់អ្នកសារព័ត៌មានថា នឹងគ្រោងនាំភរិយាទៅក្រេបទឹកឃ្មុំនៅប្រទេសប៉ែកអឺរ៉ុប។

ពិតណាស់ នៅថ្ងៃមង្គលរបស់ខ្លួនគូស្វាមីភរិយាថ្មីថ្មោង សួស វីហ្សា ថមមី បានផ្តល់បទសម្ភាសន៍ទៅកាន់អ្នកសារព័ត៌មានថា ផ្តើមចេញពីអ្នកស្គាល់គ្នា ក៏កើតមានអារម្មណ៍ស្នេហ៍ និងស្វែងយល់ចិត្តគ្នាអស់រយៈពេលជាយូរមកហើយ រហូតសម្រេចក្តីស្រម៉ៃបានចូលរោងការដូចពេលនេះ។ កាន់តែពិសេស ស្វាមីរបស់ សួស វីហ្សា បានលើកឡើងថា ទោះភរិយារបស់ខ្លួន ជាតារាល្បី ក៏ដែលប្រកាន់ខ្លួននោះដែរ ពោលគឺជាមនុស្សស្រីដែលរឹងមាំ មានការតស៊ូក្នុងជីវិត ស្រឡាញ់ក្រុមគ្រួសារ ដែលកត្តាទាំងនេះ ធ្វើឲ្យលោកស្រឡាញ់ដកចិត្តមិនរួចតែម្តង។ ពិសេសនោះគឺ ដោយសារតែជាអ្នកមកពីខេត្តដូចគ្នា ដោយសួស វីហ្សា ជាអ្នកស្វាយរៀង និងថមមី ជាអ្នកខេត្តកណ្តាល។

ជាមួយគ្នានេះ លោក ថមមី បានថ្លែងប្រាប់អ្នកសារព័ត៌មានថា ក្រោយរៀបការរួច លោកបានរៀបចំគម្រោងក្រែងទឹកឃ្មុំរួចរាល់អស់ហើយ Suprise ភរិយា។ ដោយមានគម្រោងនាំភរិយាទៅក្រែបទឹកឃ្មុំនៅបារាំង ស្វិស ហូឡង់ អេស្ប៉ាញ អាឡឺម៉ង និងប្រទេសច្រើនទៀត ក្នុងតំបន់អឺរ៉ុប ប្រហែល៨ប្រទេស។ ចំពោះការចំណាយ លោកមិនប្រាកដថាអស់ប៉ុន្មានទេ ដោយសារតែទៅដល់ទៅនោះមានផ្ទះមិត្តភ័ក្ត និងមានឡានមិត្តភ័ក្តជូនដើរលេងស្រាប់។

គួរជម្រាបថា ពិធីមង្គលការរបស់តារាស្រី សួស វីហ្សា និង ថមមី កាលពីរាត្រីយប់មិញ មានការចូលរួមពីសំណាក់អ្នកសិល្បៈក្នុងប្រទេសកម្ពុជាស្ទើរគ្រប់រូប ទាំងតារាសម្តែង តារាចម្រៀង តារាម៉ូដែល ពិធីករ ពីធីការិនី គឺបង្ហាញវត្តមានកុះករតែម្តង។ ដែលធ្វើឲ្យពិធីមង្គលរបស់អ្នកទាំងពីរ កាន់តែអធឹកអធមតែម្តង៕

ប្រភព៖ freshnews