មាន កែវ សុខផេង ទៀត! FFC បង្ហាញបញ្ជីឈ្មោះកីឡាករ ២០រូបចុងក្រោយចេញទៅស៊ីហ្គេម

កម្ពុជា៖ សហព័ន្ធកីឡាបាល់ទាត់កម្ពុជាបានបញ្ចេញបញ្ជីឈ្មោះចុងក្រោយកីឡាករទាំង ២០រូបប្រមូលផ្ដុំហ្វឹកហាត់ត្រៀមការប្រកួត កីឡាស៊ីហ្គេម លើកទី៣០ នៅប្រទេសហ្វីលីពីនហើយ។

ក្នុងចំណោមកីឡាករទាំង២០រូបនោះ មានមកពីក្លិបវិសាខា ៨នាក់, ភ្នំពេញក្រោន ៥នាក់, បឹងកេត ៤នាក់, ក្រសួងការពារជាតិ ២នាក់ និងសាលាបាល់ទាត់ជាតិបាទី ១នាក់។

ចំពោះមូលហេតុដែលមានកីឡាករលើសអាយុ ២២ឆ្នាំចំនួន ២នាក់គឺ កែវ សុខផេង និង រ៉ឹង ប៊ុនហៀង ដោយសារតែនេះជាលក្ខខណ្ឌកំណត់របស់គណៈកម្មការរៀបចំការប្រកួត ដែលអនុញ្ញាតឲ្យក្រុមនីមួយមានកីឡាករលើសអាយុចំនួន ២នាក់នៅក្នុងក្រុម។

រំលឹកឡើងវិញដែរថា សម្រាប់វិញ្ញសាបាល់ទាត់ផ្នែកបុរសសម្រាប់ស៊ីហ្គេមនេះកម្ពុជា ស្ថិតនៅក្នុងពូល A ជាមួយម្ចាស់ផ្ទះហ្វីលីពីន, ម៉ាឡេស៊ី, មីយ៉ាន់ម៉ា និងទីម័រខាងកើត។

គួរឲ្យដឹងដែរថា ព្រឹត្តិការណ៍ស៊ីហ្គេមលើកទី៣០ នៅហ្វីលីពីននឹងចាប់ផ្ដើមនៅថ្ងៃទី​៣០ ខែវិច្ឆិកា រហូតដល់ថ្ងៃទី​១១ ខែធ្នូ ឆ្នាំ​២០១៩ ដោយមានការចូលរួមពីសំណាក់ប្រទេសទាំង ១១ ដែលស្ថិតនៅតំបន់អាស៊ីអាគ្នេយ៍៕