រាជធានីភ្នំពេញ ៖ សេចក្តីរាយការណ៍បឋមបានឲ្យដឹងថា រថយន្តស៊េរីទំនើបម៉ាក LEXUS RX400h មួយគ្រឿង បានរងការខូចខាតផ្នែកខាងមុខយ៉ាងដំណំ ខណៈដែលក្រុមជនជាតិចិនប្រុសស្រីមួយក្រុមមានគ្នា៤នាក់ បើកបោះពួយក្នុងល្បឿនយ៉ាងលឿនឆ្លងភ្លើងស្តុបទៅបុករថយន្ត Ford Transit ពីចំហៀងពេញទំហឹង បណ្ដាលឲ្យខូចខាតយ៉ាងដំណំទាំងសងខាងនោះ ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស
ករណីគ្រោះថ្នាក់ចរាចរណ៍នេះដែរ បានកើតឡើងកាលពីវេលាម៉ោង៥ទាបភ្លឺព្រឹក ថ្ងៃទី២០ ខែវិច្ឆិកានេះ នៅចំណុចភ្លើងស្តុបទួលទំពូង ផ្លូវម៉ៅសេទុងកែងផ្លូវលេខ១៦៣ ក្នុងសង្កាត់បឹងកេងកងទី៣ ខណ្ឌបឹងកេងកង ។
តាមប្រភពព័ត៌មានពីសមត្ថកិច្ចបានប្រាប់ឲ្យដឹងថា មុនពេលកើតហេតុ គឺរថយន្តម៉ាក ford Transit ពណ៌ស ពាក់ស្លាកលេខភ្នំពេញ ២AK-៥៧០១ បានធ្វើដំណើរតាមបណ្តោយផ្លូវម៉ៅសេទុង ក្នុងទិសដៅពីកើតទៅលិច ។ លុះមកដល់ចំណុចត្រងផ្លូវបំបែកជា៤ ភ្លើងស្តុបទួលទំពូងក៏ស្រាប់តែមានរថយន្តស៊េរីទំនើបម៉ាក LEXUS Rx400h ពណ៌ស ពាក់ស្លាកលេខ ភ្នំពេញ ២AQ-៦១៤២ មួយឝ្រឿង បើកបរដោយជនជាតិចិនប្រុស ស្រីចំនួន៤នាក់ (ប្រុស ៣នាក់ ស្រីម្នាក់) បោះពួយក្នុងល្បឿយ៉ាងលឿនដូចហោះ មកពីផ្លូវលេខ១៦៣ ក្នុងទិសដៅពីជើងទៅត្បូងមកបុកចំពាក់កណ្តាលរថយន្តម៉ាក ford ពេញទំហឹងតែម្តង ។
តាមប្រភពដដែលបានប្រាប់បន្តទៀតថា ករណីគ្រោះថ្នាក់ចរាចរណ៍រវាងរថយន្តរបស់ជនជាតិចិនម៉ាក LEXUS RX 400h និងរថយន្តម៉ាក ford Transit នេះដែរ គឺកើតឡើងដោយសារតែខ្វះការប្រុងប្រយ័ត្នដោយបានបង្កឲ្យរថយន្តម៉ាក LEXUS RX 400h ក្រពិតផ្នែកខាងមុខខ្ទេច និងរថយន្តម៉ាក ford ក្រពិតអស់មួយចំហៀងខាងស្តាំផងដែរ តែមិនមានមនុស្សណាម្នាក់រងរបួសឡើយ ។
ក្រោយពេលកើតកម្លាំងសមត្ថកិច្ចមូលដ្ឋានបានចុះមកដល់កន្លែងគ្រោះថ្នាក់ចរាចរណ៍ខាងលើធ្វើការវាស់វែងរកខុសត្រូវ និងបញ្ជូនយករថយន្តម៉ាក LEXES RX 400h និងរថយន្តម៉ាក ford Transit ទាំង២គ្រឿងយកទៅរក្សាទុកនៅការិយាល័យចរាចរណ៍ផ្លូវគោកនៃស្នងការនគរបាលរាជធានីភ្នំពេញ ដើម្បីរង់ចាំធ្វើការដោះស្រាយគ្នាជាបន្តទៅទៀត ៕
ប្រភព៖ កោះសន្តិភាព
Bong I.T