ប្រេស៊ីល៖ អត្រានៃការកាប់បំផ្លាញព្រៃឈើនៅក្នុងតំបន់អាម៉ាហ្សូនបានកើនឡើងដល់កំរិតខ្ពស់បំផុតក្នុងរយៈពេល ១១ឆ្នាំ នេះបើយោងតាមទិន្នន័យរបស់រដ្ឋាភិបាលប្រេស៊ីលចេញផ្សាយនៅថ្ងៃច័ន្ទ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សយោងតាមការចេញផ្សាយពីវិទ្យាស្ថានជាតិស្រាវជ្រាវអវកាស (INPE) បានឲ្យដឹងថា ព្រៃទឹកភ្លៀងប្រមាណ ៩.៧៦២ គីឡូម៉ែត្រការ៉េ ត្រូវបានបាត់បង់ក្នុងរយៈពេល ១២ខែគិតត្រឹមខែកក្កដាឆ្នាំ២០១៩ ដែលនេះជាការកើនឡើង ២៩.៥% ក្នុងរយៈពេល ១២ខែកន្លងមក ហើយជាអត្រាបាត់បង់ខ្ពស់បំផុតចាប់តាំងពីឆ្នាំ ២០០៨។
ការកើនឡើងនៃការកាប់បំផ្លាញព្រៃឈើ បានកើតឡើងស្របពេលដែលប្រទេសនេះស្ថិតនៅក្រោមការដឹកនាំរបស់ប្រធានាធិបតីស្តាំជ្រុលនិយម Jair Bolsonaro ដែលបានជាប់ឆ្នោតកាលពីខែតុលាឆ្នាំ ២០១៨។
លោក Bolsonaro ត្រូវបានគេរិះគន់ថា បានធ្វើសកម្មភាពតិចតួចដើម្បីការពារព្រៃអាម៉ាហ្សូន ហើយបានបដិសេធជំនួយបរទេសចំនួន ២០លានដុល្លារ ក្នុងការជួយប្រយុទ្ធប្រឆាំងនឹងអគ្គីភ័យនៅក្នុងព្រៃនៅក្នុងអំឡុងពេលនៃកិច្ចប្រជុំកំពូល G7 នៅប្រទេសបារាំង។
អត្រានៃការកាប់បំផ្លាញព្រៃឈើយ៉ាងឆាប់រហ័សគឺជា“ លទ្ធផលផ្ទាល់នៃយុទ្ធសាស្ត្រដែលបានអនុវត្តដោយលោក Bolsonaro ក្នុងការបំបែកក្រសួងបរិស្ថាន” នេះបើយោងតាមសេចក្តីប្រកាសព័ត៌មាន របស់ក្រុមឃ្លាំមើលអាកាសធាតុដែលជាបណ្តាញជួយការពារបរិស្ថានរបស់ប្រេស៊ីល។
រដ្ឋមន្រ្តីក្រសួងបរិស្ថានប្រេស៊ីលលោក Ricardo Sales បាននិយាយនៅក្នុងសន្និសីទសារព័ត៌មានមួយនៅឯស្ថាប័ន INPE ក្នុងទីក្រុង Sao Jose dos Campos ថា“ [កម្រិតនៃការកាប់បំផ្លាញព្រៃឈើ] គឺនៅឆ្ងាយពីអ្វីដែលយើងចង់បាន ប៉ុន្តែវាក៏ឆ្ងាយពីតួលេខបីខ្ទង់ដែលត្រូវបានគេរាយការណ៍ដែរ” ។
លោកបាននិយាយថា ការកើនឡើងនៃការកាប់បំផ្លាញព្រៃឈើគឺបណ្តាលមកពីសកម្មភាពខុសច្បាប់ដូចជា ការធ្វើកសិកម្ម ការកាប់យកឈើ ការធ្វើពាណិជ្ជកម្មនិងអាជីវកម្មរ៉ែខុសច្បាប់។
លោករដ្ឋមន្រ្តីបានបន្ថែមទៀតថា ប្រទេសត្រូវការ “ ជម្រើសសេដ្ឋកិច្ចដែលមាននិរន្តរភាពសម្រាប់តំបន់ព្រៃអាម៉ាហ្សូន” ដើម្បីបញ្ឈប់ការកើនឡើងនូវកម្រិតនៃការកាប់បំផ្លាញព្រៃឈើ។
ទីភ្នាក់ងារស្រាវជ្រាវអវកាសរបស់ប្រេស៊ីលនឹងជួបគ្នានៅថ្ងៃពុធដើម្បីពិភាក្សាពីយុទ្ធសាស្ត្រ ដើម្បីប្រយុទ្ធប្រឆាំងនឹងការកាប់បំផ្លាញព្រៃឈើនៅតំបន់អាម៉ាហ្សូន។
ចំនួនអគ្គិភ័យដែលត្រូវបានរកឃើញដោយប្រព័ន្ធផ្កាយរណបក្នុងតំបន់គឺមានកំណើនឡើងខ្ពស់បំផុត បើគិតចាប់តាំងពីឆ្នាំ ២០០៨៕