ខេត្តព្រៃវែង ៖ ដោយសារមានការចុះផ្សាយពីសារព័ត៌មានផ្សេងៗ និងមានការរិះគន់ពីប្រជាពលរដ្ឋជាច្រើននាក់ទៅលើកសិដ្ឋានចិញ្ចឹមក្រពើមួយកន្លែង ស្ថិតនៅភូមិក្តីដូង ឃុំរោងដំរី ស្រុកបាភ្នំ ដែលកំពុងបង្កការភ័យខ្លាចដល់ប្រជាពលរដ្ឋដែលរស់នៅជុំវិញនោះ នៅរសៀលថ្ងៃទី១៤ វិច្ឆិកា កន្លងទៅនេះ លោក ចាន់ រ៉ាន់ អភិបាលរងខេត្តព្រៃវែង បានដឹកនាំមន្ត្រីជំនាញ និងអាជ្ញាធរជាច្រើននាក់ ចុះទៅត្រួតពិនិត្យមើលជាក់ស្តែង ដើម្បីមានវិធានការទៅតាមផ្លូវច្បាប់។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស
មន្ត្រីដែលបានចូលរួមពិនិត្យនៅក្នុងកសិដ្ឋានចិញ្ចឹមក្រពើខាងលើនោះបានអោយដឹងថា ម្ចាស់កសិដ្ឋានមានឈ្មោះ បាន នាង ភេទស្រី អាយុ៤៨ឆ្នាំ ចំណែកសត្វក្រពើដែលគាត់កំពុងចិញ្ចឹមមានចំនួន៣៨០ក្បាល បូករួមទាំងតូចទាំងធំ ហើយការចិញ្ចឹមនេះមានរយៈពេលជាង២ខែមកហើយ។
ក្នុងពេលចុះពិនិត្យនោះ លោក ចាន់ រ៉ាន់ អភិបាលរងខេត្ត បានណែនាំដល់ម្ចាស់កសិដ្ឋាន ពាក់ពន្ធ័ពីនិតិវិធីច្បាប់ និងតម្រូវអោយធ្វើកិច្ចសន្យាជាមួយមន្ត្រីជំនាញ ដើម្បីសុំលិខិតអាជីវកម្មចិញ្ចឹមក្រពើ លិខិតដឹកជញ្ជូនក្រពើ និងលិខិតអនុញ្ញាតផ្សេងៗទៀត ព្រមទាំងត្រូវរៀបចំកន្លែងចិញ្ចឹមក្រពើឲ្យបានត្រឹមត្រូវ តាមលក្ខណៈស្តង់ដា និងគិតពីបញ្ហាអនាម័យបរិស្ថានជុំវិញ ដើម្បីធានាសុវត្ថិភាពដល់បងប្អូនប្រជាពលរដ្ឋដែលរស់នៅជុំវិញនោះផងដែរ។
ជាមួយគ្នានោះដែរ លោកអភិបាលរងខេត្ត បានបញ្ជាក់ច្បាស់ថា ក្នុងករណីមានក្រពើរួចចេញពីទ្រុងទៅក្រៅ ហើយបង្កបញ្ហា ឬគ្រោះថ្នាក់ដល់បងប្អូនប្រជាពលរដ្ឋ គឺម្ចាស់ក្រពើត្រូវទទួលខុសត្រូវចំពោះមុខច្បាប់ ហើយប្រសិនបើពិនិត្យឃើញថា ការចិញ្ចឹមមិនត្រឹមត្រូវតាមស្តង់ដាបច្ចេកទេសទេនោះ លោកនឹងចាត់អោយមន្ទីរជំនាញចុះមកបិទកសិដ្ឋានចិញ្ចឹមក្រពើនេះភ្លាមតែម្តង។
គួរបញ្ជាក់ផងដែរថា កសិដ្ឋានចិញ្ចឹមក្រពើមួយនេះ បានបង្កើតឡើងច្រើនខែមកហើយ ដោយពុំមានច្បាប់អនុញ្ញាតិពីមន្ត្រីជំនាញ ឬក៏ជូនដំណឹងដល់អាជ្ញាធរមូលដ្ឋានអោយបានដឹងឮនោះទេ គឺរហូតទាល់តែមានក្រុមអ្នកសារព័ត៌មានចុះផ្សាយ ទើបខាងអាជ្ញាធរបានដឹង ហើយដឹកនាំមន្ត្រីជំនាញចុះមកត្រួតពិនិត្យនៅពេលនេះតែម្តង៕
ប្រភព៖ កោះសន្តិភាព
Bong I.T