ស៊ុតដូចព្យុះ! Chelsea និង Ajax ស៊ុតបញ្ចូលទីគ្នាជិត១០គ្រាប់ កាលពីយប់មិញនេះក្នុងព្រឹត្តិការណ៍ Champions League (មានវីដេអូ)

អង់គ្លេស៖ ក្រុមតោខៀវ Chelsea ក្នុងនាមជាម្ចាស់ផ្ទះបានបើកទ្វារកីឡដ្ឋាន​ Stamford Bridge ទទួលស្វាគមន៍ក្រុម​ភ្ញៀវ Ajax Amsterdam ក្នុងព្រឹត្តិការណ៍ Champions League កាលពីរាត្រីថ្ងៃអង្គារកន្លងទៅនេះ។

ក្រុមភ្ញៀវជាអ្នកបើកគណនីស៊ុតបើកឆាកនាំមុន ដោយការស៊ុតបញ្ចូលទីខ្លួនឯងរបស់ខ្សែប្រយុទ្ធក្រុម Chelsea កីឡាករ Tammy Abraham នៅនាទីទី២ មិនរង់ចាំយូរក្រុមម្ចាស់ផ្ទះក៏វាយបកតាមស្មើភ្លាមៗ ដោយការស៊ុតបាល់ពិន័យ១១ម៉ែត្រតាមរយៈកីឡករ Jorginho នៅនាទីទី៥។ ក្រុមភ្ញៀវបន្តសម្រុករហូតនាំមុខបាន២គ្រាប់បន្ថែមទៀតដោយការស៊ុតបញ្ចូលទីរបស់កីឡាករ​ Quincy Promes នៅនាទីទី២០ និង ការស៊ុតបញ្ចូលទីខ្លួនឯងរបស់អ្នកចាំទីក្រុម​ Chelsea កីឡាករ Kepa នៅនាទីទី៣៥។ ដូច្នេះបញ្ចប់តង់ទី១ក្រុមភ្ញៀវនាំមុខក្រុមម្ចាស់ផ្ទះ ១ទល់នឹង៣។

ចូលមកដល់តង់ទី២ការប្រកួតកាន់តែជក់ចិត្ត ដោយក្រុមភ្ញៀវមានឱកាសបន្ថែមគ្រាប់ទី៤របស់ខ្លួន តាមរយៈការស៊ុតបញ្ចូលទីដោយកីឡាករ Donny Van de Beek នៅនាទីទី៥៥ លុះមកដល់នាទីទី៦៣ ប្រធានក្រុម Chelsea កីឡាករ Cesar Azpilicueta ស្វែងរកគ្រាប់ទី២អោយក្រុមម្ចាស់ផ្ទះ។

ជាអកុសលនៅនាទីទី៦៨ ក្រុមភ្ញៀវបាត់បង់សមាជិកដល់ទៅ២រូប ដោយកីឡាករ Daley Blind និង​កីឡាករ Joel Veltmen ទទួលបានកាតក្រហមត្រូវបណ្ដេញចេញពីការប្រកួត។ ដែលនេះជាឱកាសធ្វើអោយក្រុមម្ចាស់ផ្ទះមានឱកាសវាយបកបាន២គ្រាប់បន្ថែមទៀត ដោយការស៊ុតបាល់ពិន័យ១១ម៉ែត្រតាមរយៈកីឡករ Jorginho នៅនាទីទី៧១ និងការស៊ុតបញ្ចូលទីបានយ៉ាងល្អពីសំណាក់កីឡាករ Reece James នៅនាទីទី៧៤។

ដូច្នេះបញ្ចប់៩០នាទីក្រុមទាំងពីរទទួលបានលទ្ធបផលស្មើ ៤ទល់នឹង៤ ចែកគ្នាម្នាក់១ពិន្ទុ ដោយក្រុម Ajax ឈរកំពូលតារាងក្នុងពូល​ H មាន៧ពិន្ទុ ខណៈពេលដែលក្រុម Chelsea មាន៧ពិន្ទុដូចគ្នាឈរចំណាត់ថ្នាក់លេខ២៕

បើចង់ឃើញការស៊ុតបញ្ចូលទីគ្នាអស្ចារ្យយ៉ាងណានោះ សូមទស្សនាវីដេអូខាងក្រោម៖