សម្ដេច ហ៊ុន សែន នឹងអញ្ញើញបើកការដ្ឋានធ្វើផ្លូវចំនួន ៣៤ខ្សែ នៅខេត្តកំពង់ផែស្វ័យតទឹកជ្រៅ ថ្ងៃទី១៦ខែនេះ

ព្រះសីហនុ៖ សម្ដេច នាយករដ្ឋមន្រ្តី ហ៊ុន សែន នឹងអញ្ញើញបើកការដ្ឋានស្ថាបនាផ្លូវនៅ ខេត្តព្រះសីហនុចំនួន ៣៤ខ្សែ នៅថ្ងៃទី១៦ ខែវិច្ឆិកា ឆ្នាំ២០១៩។

ដើម្បីឱ្យដំណើរការសាងសង់ស្ថាបនាផ្លូវចំនួន ៣៤ខ្សែ ក្នុងក្រុងព្រះសីហនុដំណើរការបានរលូន រដ្ឋបាលខេត្តត្រៀមរៀបចំដំណើរត្រួតពិនិត្យរបស់ លោក ជា សុផារ៉ា រដ្ឋមន្ត្រីក្រសួង ដែនដី រយ:ពេល ២ថ្ងៃ ចាប់ពីថ្ងៃទី៥ ដល់៦ ខែវិច្ឆិកា ដែលត្រូវបើកការដ្ឋានសាងសង់នាពេលខាងមុខ ក្រោមអធិបតីភាពសម្តេច ហ៊ុន សែន។ ជាការថ្លែងរបស់ លោក អភិបាលខេត្តព្រះហនុ លោក គួច ចំរើន ក្នុងកិច្ចប្រជុំ​ត្រៀម​រៀបចំ​ពិធី​បើក​ការដ្ឋាន​ស្ថាបនា​ផ្លូវ​ចំនួន​ ៣៤ខ្សែ កាលពីថ្ងៃទី៤ វិច្ឆិកា នេះ។

ក្នុងកិច្ចប្រជុំខាងលើនេះដែរ លោក អភិបាលខេត្ត បានជំរុញឱ្យក្រុមហ៊ុន និងអង្គភាពកងវិស្វកម្ម បង្ហាញពីផលប៉ះពាល់ និងប្រឈមនានាក្នុងការដ្ឋានសាងសង់របស់ខ្លួន ដើម្បីឱ្យឧបនាយករដ្ឋមន្ត្រី ជា សុផារ៉ា ផ្តល់មតិយោបល់ និងដោះស្រាយចំពោះមុខបានទាន់ពេលវេលា ចៀសវាងការឆ្លើយដាក់គ្នា នាំឱ្យការស្ថាបនាផ្លូវរបស់យើងមានភាពយឺតយ៉ាវ។ ដូច្នេះយើងត្រូវរួមគ្នាស្ថាបនាផ្លូវទាំង ៣៤ខ្សែ ប្រកបដោយតម្លាភាព និងមានគុណភាព ធានាដល់ការប្រើប្រាស់យូរអង្វែង ដើម្បីប្រែក្លាយក្រុងព្រះសីហនុ ជាតំបន់ទេសចរណ៍ប្រកបដោយភាពទាក់ទាញ សោភណ័ភាព បរិស្ថានល្អ នាពេលខាងមុខ។ ជាការសង្កត់ធ្ងន់របស់ អភិបាលខេត្តកំពង់ផែស្វ័យតទឹកជ្រៅ។

«ការស្ថាបនា​នេះត្រូវប្រើ រយៈពេល៨ខែ ដែលមានក្រុម​ហ៊ុន​ចំនួន៧​ ត្រូវធ្វើ​ទាំងថ្ងៃទាំងយប់»។ ជាការបញ្ជាក់ របស់អភិបាលខេត្តតំបន់ទេសចណ៍ជាប់មាត់សមុទ្រ លោក ថា ក្នុង​ដំណាក់​កាល​សាង់​សង់​ផ្លូវ​នេះ ​នគរបាល​ចរាចរណ៍​របស់​ស្នងការ​ដ្ឋាន​នគរបាល​ខេត្ត​ព្រះសីហនុ​ និងកងកម្លាំង​នគរបាល​ចរាចរណ៍​មក​ពីអ​គ្គ​ស្នងការ​ដ្ឋាន​នគរបាល​ជាតិ​ជាច្រើន​នាក់​ផង​ដែរ​ ត្រូវ​បាន​ដាក់​ពង្រាយ​ដើម្បី​សម្រួល​ចរាចរណ៍​ក្នុង​ដំណាក់កាល​ធ្វើ​ផ្លូវ​នេះ​។

អភិបាលខេត្តតំបន់ទេសចណ៍ជាប់មាត់សមុទ្រដដែលនេះ ក្នុងកិច្ចប្រខាងលើ ក៏បាន​ស្នើ​ប្រជា​ពល​ទូទៅ ពិសេស​ប្រជាពរដ្ឋដែលកំពង់តែនៅ​តាម​ដងផ្លូវ​ទាំង ៣៤ខ្សែផ្ទាល់​ សូម​ឱ្យមានការសហការ​ជាមួយ​ក្រុមការងារ​ស្ថាបនាផ្លូវទាំងនេះ ​ដើម្បី​ងាយស្រួល​ក្នុង​ការ​បំពេញការងារ​ប្រកបដោយរលូន ព្រមទាំងចូលរួមគោររពចរាចរណ៍ផងដែរ។

ក្នុងផែនការណ៍របស់គណៈកម្មាធិការ​ជាតិ​គ្រប់គ្រង​ និង​អភិវឌ្ឍ​តំបន់ឆ្នេរ​សមុទ្រ​កម្ពុជា​ បានសម្រេច​លើក​គម្រោង​អភិវឌ្ឍ​ហេដ្ឋារចនាសម្ព័ន្ធ​ ផ្លូវ​ក្រុង​ក្នុង​ខេត្ត​ព្រះសីហនុ​ សរុប​ចំនួន​ ៣៤ខ្សែ​ ប្រវែងសរុប​ ៨៤,៥០៥​ម៉ែត្រ​ ចែកចេញជា​៣​ប្រភេទ​៖

​ទី​១-មហាវិថី​មាន​ចំនួន​ ៣ខ្សែ​ មានប្រវែង​សរុប​ ២២,៧៣១​ម៉ែត្រ​ មាន​ទទឹង​ ៥០​ម៉ែត្រ​ ក្នុងនោះផ្លូវ​រថយន្ត​ ៦ គន្លង​ ផ្លូវ​ទោចក្រយាន​យន្ត២គន្លង​។

​ទី២​-វិថីមាន​ចំនួន ១៤​ខ្សែ​ ប្រវែង​សរុប​ ៤៩​,៩៥៧​ម៉ែត្រ​ មាន​ទទឹង​ពី​ ២០​ម៉ែត្រ​ ទៅ​ ៤០​ម៉ែត្រ​ ដែលមានផ្លូវ​រថយន្ត​ ២ ទៅ​ ៤គន្លង​ សម្រាប់ផ្លូវ​ទោចក្រយាន​យន្តមាន​ ២គន្លង​ ។

សូមបញ្ជាក់ថា ប្រជាជនរស់នៅក្នុងខេត្តព្រះសីហនុបច្ចុប្បន្ន មានការកើនឡើង​រហូតដល់ជាង ៣០ម៉ឺននាក់ ស្របពេលដែលសន្ទុះនៃកំណើនសេដ្ឋកិច្ចនៅក្នុងខេត្តទាំងមូលមានភាពល្អប្រសើរ ដែលជំរុញឱ្យប្រជាពលរដ្ឋក្នុងតំបន់មានលទ្ធភាពក្នុងការរកបានចំណូលខ្ពស់ និងមានតម្រូវការកាន់តែច្រើន។ រាជរដ្ឋាភិបាល និងឯកជនបានចំណាយទឹកប្រាក់ប្រមាណ ៥០០លានដុល្លារ ដើម្បីស្តារ និងជួសជុលថែទាំផ្លូវនៅខេត្តព្រះសីហនុចំនួន ២២ខ្សែដែលរងខូចខាតដោយគ្រោះធម្មជាតិ។

ជាង២ឆ្នាំចុងក្រោយនេះ ខេត្តព្រះសីហនុ បានក្លាយទៅជាគោលដៅយ៉ាងសំខាន់របស់អ្នកវិនិយោគមកពីតំបន់ផ្សេងៗ ពិសេសប្រទេសចិន បច្ចុប្បន្ន បាននិងកំពុងធ្វើឱ្យខេត្តព្រះសីហនុ មានការអភិវឌ្ឍយ៉ាងលឿនទៅមុខ។ ជាក់ស្ដែងការវិនិយោគនៅខេត្ដព្រះសីហនុ មានអគារខ្ពស់ៗ ប្រមាណជិត ២០០អគារ ដែលកាលពីមុន ខេត្ដនេះមានតែអាគារខ្ពស់តែមួយគត់ គឺសណ្ឋាគារ ៧ជាន់។​

ខេត្ដព្រះសីហនុ ត្រូវបានរាជរដ្ឋាភិបាលកម្ពុជា ចាត់ទុកជាប៉ូលសេដ្ឋកិច្ចមួយ ក្នុងចំណោមប៉ូល សេដ្ឋកិច្ចទាំងបី រាជធានីភ្នំពេញ ខេត្ដសៀមរាប និងខេត្ដព្រះសីហនុ ដោយប្រកាសប្រែក្លាយខេត្ដនេះទៅជាតំបន់សេដ្ឋកិច្ច ពិសេសគំរូពហុបំណងតែមួយគត់ ក្នុងប្រទេសកម្ពុជា ដែលសក្ដានុពលសំខាន់ៗ មានលក្ខណៈពិសេសដូចជា ផ្ទៃដីនៅធំទូលាយសម្រាប់ការវិនិយោគរោងចក្រសហគ្រាសផ្សេងៗ៕

ដោយ៖ ឌីណា