មិនមែនជាអាជីព តែអេតវីនសម្តែងសិល្បៈល្ខោនខ្មែរ និងប្រើពាក្យរាជស័ព្ទបានយ៉ាងល្អក្នុងរឿងថ្មី កំពុងត្រៀមចាក់ផ្សាយនៅ ភី អិន អិន! (មានវីដេអូ)

ភ្នំពេញ៖ តារាសម្តែងប្រុសវ័យក្មេងមានមន្តស្នេហ៍ ប្រឡែងខ្លួនចូលក្នុងវិស័យសិល្បៈភាពយន្តបានជាច្រើនរឿង លោក អេតវីន នៅរយៈពេលប៉ុន្មានឆ្នាំនេះ លោកទទួលបានប្រជាប្រិយភាពទាំងការសម្តែងក្នុងសាច់រឿង ក៏ដូចជាពិធីករកម្សាន្តនានាផងដែរ។ ទន្ទឹមនឹងនេះ សម្រាប់ការមកដល់នៃខ្សែភាពយន្តភាគខ្មែររបស់ ភី អិន អិន សម្រាប់ឆ្នាំ២០១៩ នេះ លោកត្រូវបានផលិតករភាពយន្តជ្រើសរើសឱ្យដើរជាតួឯកប្រុសក្នុងរឿងភាគថ្មីមួយរបស់ស្ថានីយ៍ទូរទស្សន៍ ភី អិន អិន នោះគឺរឿង «តួគេ ខ្ញុំសម្តែង»។

ជាមនុស្សតែម្នាក់ ប៉ុន្តែត្រូវដើរជាតួអង្គពីរផ្សេងគ្នា ដែលតម្រូវឱ្យលោកបត់បែនទៅតាមចរិតតួអង្គ និងសាច់រឿងទាំងអស់នោះ ប៉ុន្តែទោះបីជាយ៉ាងណាលោកនៅតែអាចសម្តែងបានយ៉ាងល្អ និងមិនតែប៉ុណ្ណោះគឺលោកមានទេព្យកោសល្យខ្ពស់ក្នុងការបន្ថែមនូវពាក្យពេចន៍កំប្លុកកំប្លែង រួមនឹងកាយវិការដ៏គួរឱ្យស្រឡាញ់ថែមទៀតផង។

ទន្ទឹមនឹងគ្នានេះដែរ តួឯកប្រុសរូបនេះអាចសម្តែងក្នុងឈុតឆាកសិល្បៈល្ខោនខ្មែរ បានទាំងទម្រង់ល្ខោនបាសាក់ និងយីកេ មិនចាញ់អ្នកអាជីពប៉ុន្មានទេ ដោយក្នុងនោះមានការបញ្ចេញនូវពាក្យពេចន៍ ពំនោលឃ្លោងឃ្លាយ៉ាងណែងណងទៀតផង។

ជាមួយគ្នានេះដែរ មានអ្នកគាំទ្រជាច្រើននាក់ ដែលមានការភ្ញាក់ផ្អើលយ៉ាងខ្លាំងនៅពេលឃើញ អេតវីន ដែលធ្លាប់តែសម្តែងក្នុងឈុតសម័យ ហើយបែរជាមកគ្រងឈុតបុរាណ ក្បូរក្បាច់រចនា និងថែមទាំងបង្ហាញមកជាមួយនឹងកាយវិការរស់រវើកថែមទៀតផង។

ដោយឡែកចំពោះតួអង្គមួយទៀតនោះ គឺលោកត្រូវផ្លាស់ប្តូរចិរត ទាំងពាក្យសម្តី ទាំងសម្លៀកបំពាក់ពីតួអង្គក្មេងប្រុសកម្លោះមកជាតួព្រះអង្គម្ចាស់យ៉ាងសង្ហាវិញ ដោយមានអង្គរក្សឆ្វេងស្តាំនៅចាំបម្រើ។ សម្រាប់តួអង្គជាខ្សែរាជវង្សនេះដែរ លោកក៏បានបញ្ចាក់ថា វាមានការពិបាកបន្តិច ដោយត្រូវរៀននិយាយពាក្យរាជស័ព្ទឱ្យបានល្អ និងមិនតែប៉ុណ្ណោះត្រូវសម្តែងឱ្យឃើញចេញមក ជាមនុស្សកាច ម៉ត់ចត់នឹងការងារ និងឆ្លាតវាងវៃសាកសមជាខ្សែលោហិតនៃរាជវង្ស។

ក្នុងនោះក៏មានការទន្ទឹងរង់ចាំពីសំណាក់ទស្សនិកជនជាច្រើនអំពីសាច់រឿងក្នុងភាពយន្តខ្មែរនេះ ដោយចង់ដឹងថា តើនៅក្នុងឈុតឆាកនៃរឿង មានលក្ខណៈល្អមើលយ៉ាងណា? ហើយថាតើ ហេតុអ្វីបានជាអ្នកនិពន្ធចងក្រងសាច់រឿងនេះតម្រូវឱ្យតួអង្គព្រះអង្គម្ចាស់ និងអ្នកកម្លោះសាមញ្ញម្នាក់នោះ មានមុខមាត់ដូចគ្នានឹងមនុស្សតែមួយ ឬមកពីពួកគេមានអ្វី ដែលជាប់ទាក់ទងនឹងគ្នា?

ដូចច្នេះមានតែរង់ចាំទស្សនាការចាក់ផ្សាយរបស់ ភី អិន អិន ដែលនឹងនាំយកមកបម្រើចំណីចក្ខុ ក៏ដូចជាកាដូចុងឆ្នាំក្នុងពេលឆាប់ៗនេះ៕

ទស្សនាវីដេអូខាងក្រោម៖