នេះជាអារម្មណ៍របស់ អ៊ូ តារា ក្រោយសម្ដែងប៉ះគ្នា ជាមួយតារាចិន និងថៃ ក្នុងរឿង «វាលប្រមាញ់»!

ភ្នំពេញ៖ គ្មាននរណាមិនចាប់អារម្មណ៍នោះទេ ជាមួយនឹងភាពយន្តរឿង «វាលប្រមាញ់» ដោយសារតែនេះ គឺជាភាពយន្តខ្មែរ ដែលប្រើដើមទុនជាង១លានដុល្លារ និងជាភាពយន្តដែលសម្ដែងតួឯកដោយតារាក្បាច់គុនចិន។ អគ្គលេខាធិការសហព័ន្ធល្បុក្កតោលោក អ៊ូ តារា គឺជាតារាក្បាច់គុនខ្មែរ ដែលបានសម្ដែងជាតួអង្គសំខាន់នៅក្នុងរឿងនេះ ដោយលោកបានបង្ហាញអារម្មណ៍ជាច្រើនក្រោយពីបានសម្ដែងជាមួយតារាចិន និងថៃ ក្នុងផ្ទៃរឿងតែមួយ។

ថ្លែងក្នុងពិធីបើកសម្ពោធភាពយន្តរឿង «វាលប្រមាញ់» កាលពីល្ងាចថ្ងៃទី១៧ កញ្ញា ឆ្នាំ២០១៩ នៅផ្សារទំនើបអុីអនសែនសុខ លោក អ៊ូ តារា និយាយថា ក្នុងភាពយន្តនេះផលិតករតម្រូវឱ្យលោកសម្ដែងជាតួអង្គអង្គរក្សអ្នកមាន ដោយមានឈុតវាយតប់ច្រើនតាំងពីឈុតដែលលោកចេញមុខដំបូងរហូតដល់ចប់។ នៅក្នុងរឿងនេះ ដោយលោកគឺជាតួអង្គរក្ស ដែលប្រើក្បាច់ក្បុកក្កតោ ហើយត្រូវការពារចៅហ្វាយនាយ។ ខណៈដែលតួអង្គខ្មែរស្ទើរទាំងអស់ ថ្ងូរពីការលំបាករឿងប្រើភាសាឆ្លងឆ្លើយជាមួយជនជាតិចិន និងថៃ ដែលជាតួអង្គធំ ប៉ុន្តែលោកប្រាប់ថាខ្លួនមិនសូវលំបាកនោះទេ ដោយសារតែឈុតភាគច្រើនគេឱ្យលោករត់ បាញ់បោះ និងវាយតប់ ច្រើនជាងវ៉ៃ។

យ៉ាងណាមិញលោកថា សម្រាប់ឈុតឆាកវាយតប់ ក៏លោកអត់មានការលំបាកនោះដែរ ដោយសារតែលោកគឺជាអ្នកឯកទេសក្បាច់គុនល្បុក្កតោស្រាប់ ដែលចេះស្ទាត់ជំនាញពីការប្រើប្រាស់ក្បាច់គុន និងចេះបត់បែនតាមអ្វីដែលខាងផលិតករចង់បាន។ លោកថាក្នុងភាពយន្តនេះ លោករំភើបជាងគេត្រង់ឈុតឱ្យលោកជាជនជាតិខ្មែរប្រើក្បាច់ល្បុក្កតោវ៉ៃគ្នាជាមួយតារាចិន ដែលមិនខុសពីតម្រូវឱ្យក្បាច់គុនប្រទេសទាំងពីរប៉ះគ្នា។

លោក អ៊ូ តារា បដិសេធថា ខ្លួនច្រានចោលមិនថតភាពយន្តក្នុងស្រុក ដែលមិនមែនផលិតដោយបរទេសដូចជារឿង «Jailbreak» និងរឿង «វាលប្រមាញ់» នោះទេ ប៉ុន្តែមកពីរឿងភាគទាក់ទងមកលោកទទួលថតមិនបានព្រោះអត់ពេល ហើយសម្រាប់រឿងភាគ គឺមិនធ្លាប់មានអ្នកចង់បានលោកឱ្យទៅសម្ដែង។

លោក ជីមី ហេនឌ័រសុន (Jimmy Henderson) ​អ្នកដឹកនាំសម្ដែង ដែលធ្លាប់ចូលរួមផលិតភាពយន្តរឿង «Jailbreak» បានអះអាង លោករំពឹងយ៉ាងខ្លាំងថាភាពយន្តរឿង «វាលប្រមាញ់ ឬ The Prey» ដែលប្រទុនជាង១លានដុល្លារ នឹងផ្ទុះការគាំទ្រមិនចាញ់ភាពយន្តរឿង «Jailbreak» ដែលលោកធ្លាប់បានចូលរួមផលិតនោះទេ។

ម្យ៉ាងមកពីភាពយន្តនេះសម្ដែងដោយតារាក្បាច់គុនចិន និងតារាមកពីប្រទេសផង ទើបរឹតតែមិនពិបាកទុកចិត្តសម្រាប់សន្ទុះគាំទ្រ។ មួយរឿងនេះថតនៅស្រុកខ្មែរទាំងអស់ ហើយឈុតឆាកក្នុងរឿងទាំងមូលគឺពោរពេញដោយការបាញ់ប្រហារ ផ្សងព្រេងក្នុងព្រៃ និងវាយតប់ជក់ចិត្តលំនាំតាមរឿង «The Most Dangerous Game» របស់លោក Rechard Connell​។

លោក ជីមី ហេនឌ័រសុន បន្តថា នេះជាភាពយន្តខ្មែរកម្រិតអន្តរជាតិ ដែលការប្រកាសលក់សំបុត្រគ្រប់រោង គឺចាប់ពីថ្ងៃទី១៩ កញ្ញា តទៅ។

ក្នុងថ្ងៃសម្ពោធដាក់បញ្ចាំងនោះ គេឃើញមានវត្តមានសិល្បករ សិល្បការិនី ផលិតករ និងក្រុមផលិតជាជនជាតិខ្មែរ និងបរទេសយ៉ាងច្រើនកុះករ ដោយភាពយន្តនេះក្រោយដាក់បញ្ចាំងជូនភ្ញៀវទស្សនា ម្នាក់ៗមិនសរសើរ មិនលាន់មាត់មិនបាន ទាំងគុណភាពសម្លេង ពន្លឺ និងសាច់រឿងពីមួយឈុតទៅមួយឈុត៕