រាជធានីភ្នំពេញ ៖ តាមសេចក្តីរាយការណ៍បឋមបានឱ្យដឹងថា មានករណីអគ្គិភ័យបានឆាបឆេះផ្ទះប្រជាពលរដ្ឋខ្មែរអ៊ិស្លាមជាច្រើនខ្នង និងបណ្តាលឱ្យស្លាប់ទាំងឪពុកនិងកូនកូនប្រុសម្នាក់ ។ ខណៈអគ្គិភ័យកំពុងឆាបឆេះផ្ទះប្រជាពលរដ្ឋយ៉ាងសន្ធោសន្ធៅនេះ ត្រូវបានរថយន្តពន្លត់អគ្គិភ័យជាច្រើនគ្រឿងកំពុងចុះមកជួយអន្តរាគមន៍បាញ់ទឹកពន្លត់ផងដែរ ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សហេតុការណ៍ខាងលើនេះបានកើតឡើងកាលពីវេលាម៉ោង១២និង២០នាទីថ្ងៃត្រង់ថ្ងៃទី១៧ កញ្ញា ឆ្នាំ២០១៩ នៅម្តុំវិហារអ៊ិស្លាម គីឡូម៉ែត្រលេខ៨ តាមបណ្តោយផ្លូវជាតិលេខ៥ ក្នុងភូមិឃ សង្កាត់ច្រាំងចំរេះទី២ ខណ្ឌឫស្សីកែវ ។
ជនរងគ្រោះទាំង២នាក់ឪពុកនិងកូនខាងលើ រួមមានឪពុកឈ្មោះលី ឡោះ បានរងរបួសធ្ងន់ ក្រោយមកក៏បានស្លាប់ ចំណែកកូនប្រុសឈ្មោះសៃ ហ៊ូឡោះ អាយុ១១ឆ្នាំ ត្រូវបានគេអះអាងថា មានសតិមិនគ្រប់ ត្រូវភ្លើងឆេះខ្លោច បណ្តាលឱ្យស្លាប់ផងដែរ ។
តាមសេចក្តីរាយការណ៍បានបន្តទៀតថា គិតមកត្រឹមវេលាម៉ោង១និងរសៀលថ្ងៃដដែល អគ្គិភ័យបានរលត់ទៅវិញ បណ្តាលឱ្យរងការខូចខាតផ្ទះចំនួន១១ខ្នង ក្នុងនោះផ្ទះចំនួន៦ខ្នងត្រូវភ្លើងឆេះទាំងស្រុង ចំណែកផ្ទះចំនួន៥ខ្នងទៀត ដោយផ្ទះខ្លះត្រូវភ្លើងឆេះអស់មួយចំហៀង និងផ្ទះខ្លះត្រូវភ្លើងឆេះអស់ដំបូល ហើយរថយន្តពន្លត់អគ្គិភ័យដែលចុះមកជួយអន្តរាគមន៍ក្នុងហេតុការណ៍ខាងលើមានចំនួនសរុប២៦គ្រឿង ។ ទោះបីយ៉ាងណា គេមិនទាន់ដឹងពីមូលហេតុនៅឡើយទេ ។ ព័ត៌មានលម្អិតនឹងមានផ្សាយនៅលើទំព័រកាសែតកោះសន្តិភាព ៕
ប្រភព៖ កោះសន្តិភាព
Bong I.T