ឥណ្ឌា៖ ថ្មីៗនេះដេអូឃ្លីបមួយ បាននឹងកំពុងតែទទួលការចាប់អារម្មណ៍យ៉ាងខ្លាំង ពីសំណាក់មហាជនជាច្រើននៅលើបណ្តាញសង្គម ជុំវិញនឹងសកម្មភាពដ៏គួរឲ្យរំជួលចិត្តមួយ ដែលមេឆ្កែមួយក្បាលខំប្រឹងកកាយដី ដើម្បីជួយសង្គ្រោះកូនៗរបស់វា ដែលជាប់គាំងក្រោមគំនរបាក់បែក ក្រោយបាក់រលំផ្ទះសង្កត់លើពួកវា។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សវីដេអូឃ្លីបនេះ ត្រូវបានបង្ហោះចែកចាយដោយអង្គការជួយសង្គ្រោះសត្វតាមផ្លូវ Animal Aid Unlimited ក្នុងរដ្ឋ Rajasthan ប្រទេសឥណ្ឌា។ នៅក្នុងនោះ គឺបានបង្ហាញពីសកម្មភាព បុរសម្នាក់គឺកំពុងតែរើកកាយថ្ម ក៏ដូចជាបន្ទះបាក់បែកផ្សេងៗ ដើម្បីជួយសង្គ្រោះកូនឆ្កែប៉ុន្មានក្បាល ដែលបានជាប់គាំងក្រោមគំនរបាក់បែកនោះ។
អ្វីដែលគួរឲ្យចាប់អារម្មណ៍ខ្លាំងនោះ គេកត់សម្គាល់ឃើញថា មេឆ្កែមួយក្បាលក៏បានបញ្ចេញសកម្មភាពយ៉ាងជ្រួលច្របល់ ដោយខំប្រឹងកកាយដីជាមួយនឹងបុរសម្នាក់នោះ ដើម្បីជួយសង្គ្រោះកូនរបស់វាផងដែរ។
រយៈពេលប៉ុន្មានវិនាទីក្រោយមក គេក៏ឃើញកូនឆ្កែមួយក្បាលត្រូវបានយកចេញពីក្នុងរន្ធ ឬក្រោមគំនរបាក់បែក ហើយបុរសនោះក៏បានលើកវា ដាក់ក្រោមច្រមុះមេរបស់វា ដែលហាក់ក្នុងន័យឲ្យមេរបស់វាបានថើបកូនរបស់វាផងដែរ។ ក្រោយមក កូនឆ្កែជាបន្តបន្ទាប់ក៏ត្រូវបានជួយសង្គ្រោះទៀតផងដែរ។
គួរឲ្យដឹងផងដែរថា ការបាក់ឬដួលរលំអគារ គឺជាករណីដ៏គួរឲ្យព្រួយបារម្ភមួយក្នុងប្រទេសឥណ្ឌា ដោយសារតែបញ្ហាភូមិសាស្រ្ត និងសំណង់មិនត្រឹមត្រូវ។ បើគិតតាំងពីដើមខែកញ្ញា មកនេះ មនុស្សចំនួន២នាក់ហើយ បានស្លាប់បាត់បង់ជីវិត ខណៈមនុស្ស៣នាក់ផ្សេងទៀតបានរងរបួស ដោយសារតែករណីបាក់រលំអគារបែបនេះ ក្នុងទីក្រុង New Delhi ៕
ចង់ជ្រាបច្បាស់ ទស្សនាវីដេអូខាងក្រោម៖