អ្នកចិត្តបុណ្យទាំងនេះ នាំគ្នាឧបត្ថម្ភឲ្យបេក្ខភាព X Factor ចាន់ឡា សូម្បីតែនាងគ្រត ក៏មិនមើលនឹងភ្នែកដែរ

ភ្នំពេញ៖ ប្រិយមិត្តដែលជាអ្នកតាមដានកម្មវិធីលំដាប់ពិភពលោក X Factor Cambodia រដូវកាលទី ១ ច្បាស់ជាស្គាល់នូវបេក្ខភាពមួយរូបមានឈ្មោះថា លៀង ចាន់ឡា ដែលជាបេក្ខភាពមកពីគ្រួសារក្រីក្រ និងមានរូបរាងខ្មៅមិនស្អាតដូចបេក្ខភាពដទៃ។

យ៉ាងណាមិញ ក្រោយពីប្រកួតជម្រុះដល់វគ្គ Boostcamp របស់កម្មវិធី កញ្ញា ចាន់ឡា ត្រូវបានមហាជនមើលឃើញថា នាងពិតជាគួរឲ្យអាណិតខ្លាំងណាស់ ហើយក៏មានមហាជនខ្លះទៀត បានបោះសម្តីថា ការប្រកាសឲ្យចាន់ឡា ជាប់ក្នុងវគ្គ Boost Camp ក្រោយគេតែម្នាក់ឯង ហាក់ចង់មើលងាយ និងរើសអើងដល់រូបនាងជាខ្លាំង។

ក្រោយពីផ្ទុះសម្តីមហាជនពេញបណ្តាញសង្គមមក ស្រាប់តែគេឃើញមហាជនមួយចំនួន បានបង្ហោះរូបកញ្ញា លៀង ចាន់ឡា ហើយថែមទាំងភ្ជាប់ជាមួយសារដ៏រំភើបថាចង់ជួយជាគ្រឿងសម្អាងថែរក្សាសម្រស់ដល់បេក្ខនារីដ៏កម្សត់រូបនេះ ឲ្យមានភាពស្រស់ស្អាត។

មិនត្រឹមតែប៉ុណ្ណោះ សូម្បីតែតារាកំប្លែងដ៏ល្បីនាងគ្រត ក៏រូបនាងមិនមើលនឹងភ្នែកនោះដែរ ដោយរូបនាងក៏បានបង្ហោះស្វែងរកបេក្ខនារីរូបនេះ ដើម្បីជួយឧបត្ថម្ភជាសម្ភារៈមួយចំនួនផងដែរ។

ទោះជាយ៉ាងណាក្តី ទាំងនេះពិតជារឿងដ៏គួរឲ្យរំភើបចិត្តខ្លាំងមែនទែន សម្រាប់បេក្ខនារីចាន់ឡា ដោយរូបនាងបានទទួលក្តីអាណិតអាសូរពីសំណាក់មហាជន ឯចំណែកអ្នកលេងបណ្តាញសង្គមវិញ ក៏បង្ហាញក្តីរំភើបជំនួសបេក្ខនារីរូបនេះផងដែរ៕

តើប្រិយមិត្តយល់យ៉ាងណាដែរ?