ម្ចាស់បណ្ណាគារជាច្រើន ងាកមកគាំទ្រស្នាដៃអ្នកនិពន្ធ ខ្មែរវ័យក្មេង!

“ដោយសារកម្សួលនៃការលក់សៀវភៅ​ «ពេលវេលា» ​នៅបន្ត អ៊ីចឹងដំបូង​ៗយើងបារម្ភពីបឹងអតីត​ដែរ ប៉ុន្តែ​ក្រោយមក​ឃើញ​ចរាចរបានល្អមិនចាញ់ស្នាដៃអ្នកនិពន្ធជើងចាស់ឡើយ​។ នេះជាសញ្ញា​ដ៏វិជ្ជមាន​មួយ​សម្រាប់តម្រា​ ដែលបានរួមចំណែក​ក្នុងការបំផុសស្នាដៃយុវវ័យ​អ្នកតែងនិពន្ធ​ថ្មី ឲ្យលេចឡើងជាបន្តបន្ទាប់”។

“គ្រប់អ្នកនិពន្ធមិនថាចាស់ថ្មី តែងតែធ្វើការ​យ៉ាងសកម្មក្នុងការ​តាក់តែងស្នាដៃ​របស់ខ្លួន គឺគាត់លះបង់ និង​ព្យាយាម​ ចំណែក​យើងគ្រាន់តែយកមកលក់បន្ត និងអាន​វា។ ​យើង​អាចរួមចំណែក​ជួយបាន​ដោយមិនសោកស្តាយអ្វីទាងអស់”។

“ពីដំបូងខ្ញុំហ៊ាន​កុម្ម៉ង់តែ ​៥០ ក្បាលទេ បង លី សុផាត បណ្ណារក្ស​នៅតម្រា គាត់លើកទឹកចិត្ត​ថា​ទិញយក ១០០ ទៅអត់អីទេ ​តម្រាធ្វើទីផ្សារច្បាស់លាស់ត្រឹមត្រូវចំគោលដៅ ខ្ញុំនៅតែមិនហ៊ាន ព្រោះអីយើងគ្មានលុយទេ លក់សៀវភៅរយក្បាល យើងហ៊ាន​តែជាមួយ​អ្នកនិពន្ធល្បីៗ។ក្រោយមកអ្នកគ្រូ ម៉ីសន ​សុធារី ក៏ជួយនិយាយទៀតថា រឿង បឹងអតីត ត្បិតតែ​អ្នកនិពន្ធមិនមានស្នាដៃកន្លងមកច្រើន តែ​ការរចនា​រឿងមាន​គន្លាក់ល្អ សាច់រឿងណែន​ ហើយភាសា​យុវវ័យ ខ្ញុំក៏​សាកយកមក ១០០ ដឹងអីពីរថ្ងៃសោះ អស់ ៧០ ក្បាល ខ្ញុំក៏ទៅយក ៥០ មកទៀត ខ្ញុំគិតថា​ អ្នកអាន​ជាច្រើនគេ​ទុកចិត្ត​តម្រាលើគុណភាព គុណតម្លៃ និងការធានា”។