ភ្នំពេញ ថ្ងៃទី 02 ខែ កញ្ញា ឆ្នាំ 2026៖ ក្រុមហ៊ុន Smart Axiata ដែលជាប្រតិបត្តិករទូរគមនាគមន៍ឌីជីថល និង​ដំណោះស្រាយ ICT នៅកម្ពុជា និងអាយ អេស អាយ គ្រុប (ISI GROUP) ដែលជាក្រុមហ៊ុនឧស្សាហកម្ម​ឈានមុខ​គេ​មួយនៅកម្ពុជា បានប្រកាសនូវភាពជាដៃគូយុទ្ធសាស្ត្រ ដែលចាប់ផ្តើមតាមរយៈការឧបត្ថម្ភក្លឹបបាល់ទាត់ អាយ អេស អាយ ដង្កោសែនជ័យ (ISI Dangkor Senchey FC)។ តាមរយៈកិច្ចសហការនេះ ក្រុមហ៊ុន Smartនឹងក្លាយជាដៃគូ​ផ្នែកទូរគមនាគមន៍ និងដំណោះស្រាយឌីជីថលរបស់ក្លឹបដោយក្នុងនោះមានការតភ្ជាប់សេវាអ៉ីនធឺណិត និងការផ្ដល់ជូន​​នូវដំណោះស្រាយទូរគមនាគមន៍   ក៏ដូចជាសេវាកម្មឌីជីថលរបស់ Smart ភ្ជាប់ជាមួយអាជីវកម្ម​ដ៏ទូលំទូលាយរបស់ ISI Group ដើម្បីបង្កើតឱកាសថ្មីៗសម្រាប់អ្នកគាំទ្របាល់ទាត់ សហគមន៍ និងអាជីវកម្មនៅ​ទូទាំង​ប្រទេសកម្ពុជា។

ក្រោមកិច្ចព្រមព្រៀងរយៈពេលមួយឆ្នាំនេះ ក្រុមហ៊ុន Smart នឹងគាំទ្រ អាយ អេស អាយ ដង្កោសែនជ័យ (ISI Dangkor Senchey FC) លើគំនិតផ្តួចផ្តើមជាច្រើនក្នុងគោលបំណងលើកកម្ពស់បទពិសោធន៍បាល់ទាត់​សម្រាប់​អ្នកគាំទ្របាល់ទាត់ និងសហគមន៍។ សកម្មភាពទាំងនេះរួមមានការផ្សព្វផ្សាយពីកីឡដ្ឋាន និងថ្ងៃប្រកួត ការផ្តល់សេវា Wi-Fi សម្រាប់អ្នកចូលរួមគាំទ្របាល់ទាត់ ការផ្សាយផ្ទាល់ការប្រកួត សកម្មភាពចូលរួមរបស់អ្នកគាំទ្រ​តាមប្រព័ន្ធឌីជីថល ការរួមបញ្ចូលមុខងារសេវាកម្មលក់សំបុត្រ និងកម្មវិធីជួបសំណេះសំណាល រវាងកីឡាករ គ្រូបង្វឹក និងសិស្សនិស្សិតព្រមទាំងយុវជនផងដែរ។ ក្រុមហ៊ុន Smart នឹងសហការជាដៃគូ​ផ្នែកទូរគមនាគមន៍ និងដំណោះស្រាយ​ឌីជីថល​របស់ក្លឹបពេញមួយពេញមួយឆ្នាំនៃការគាំទ្រនេះ។

គួរបញ្ជាក់ផងដែរថា បច្ចុប្បន្ននេះ កីឡាបាល់ទាត់កំពុងដើរតួនាទីកាន់តែសំខាន់ក្នុងការផ្សារភ្ជាប់សហគមន៍ និង​ជំរុញ​ទឹកចិត្ត​យុវជននៅកម្ពុជា។ ក្រុមហ៊ុន Smart ទទួលស្គាល់ថា កីឡា ជាពិសេសកីឡាបាល់ទាត់ មានសមត្ថភាព​ក្នុងការនាំមកនូវការជួបជុំដ៏មានអត្ថន័យ បង្កើនមោទនភាពសហគមន៍ និងបង្កើតឱកាសសម្រាប់យុវជន​ជំនាន់​ក្រោយ​ផងដែរ។ តាមរយៈកិច្ចសហការជាមួយ អាយ អេស​ អាយ​ គ្រុប និងការគាំទ្រក្លិប អាយ អេស អាយដង្កោសែនជ័យ FC នេះ ក្រុមហ៊ុន Smart មានបំណងរួមចំណែកដល់ការអភិវឌ្ឍវិស័យបាល់ទាត់នៅកម្ពុជា ព្រមទាំងលើកកម្ពស់​បទពិសោធន៍របស់អ្នកគាំទ្រតាមរយៈការតភ្ជាប់សេវាអ៉ីនធឺណិត បច្ចេកវិទ្យាឌីជីថល ប្រកបដោយនវានុវត្តន៍ និង​គំនិតផ្តួចផ្តើមដែលផ្ដោតលើផលប្រយោជន៍ដល់សហគមន៍យើង។

លោក Ritesh Kumar Singh នាយកប្រតិបត្តិក្រុមហ៊ុន Smart Axiata បានមានប្រសាសន៍ថា៖ «យើងមានសេចក្តីសោមនស្សរីករាយក្នុងការចាប់ដៃគូសហការជាមួយ អាយ អេស អាយ គ្រុប (ISI GROUP) តាមរយៈការឧបត្ថម្ភ ISI Dangkor Senchey FC។ កីឡាបាល់ទាត់មានសមត្ថភាពពិសេសក្នុងការផ្សារភ្ជាប់ទំនាក់ទំនង បំផុសគំនិតសហគមន៍ និងបង្កើតបទពិសោធន៍រួមមួយសម្រាប់សហគមន៍។ តាមរយៈភាពជាដៃគូនេះ យើងខ្ញុំមានមោទនភាពការផ្ដល់ការតភ្ជាប់សេវាអ៉ីនធឺណិតប្រកបដោយគុណភាពនិងបទពិសោធន៍ឌីជីថល​កាន់តែ​ប្រសើរ​សម្រាប់អ្នកគាំទ្រ ខណៈពេលរួមចំណែកដល់​ការអភិវឌ្ឍវិស័យកីឡាបាល់ទាត់នៅកម្ពុជា។ ជាមួយគ្នានេះ ការឧបត្ថម្ភនេះក៏ជាចំណុចចាប់ផ្ដើមនៃទំនាក់ទំនងដៃគូយុទ្ធសាស្ត្រដ៏ទូលំទូលាយរវាងស្ថាប័នទាំងពីរ ដែលមាន​ចក្ខុវិស័យរួម​ក្នុងការពង្រឹងលើកកម្ពស់សហគមន៍ និងជំរុញអនាគតឌីជីថលរបស់កម្ពុជា»។

លោក កាំង សេន នាយកប្រតិបត្តិនៃក្រុមហ៊ុន អាយ អេស អាយ E&C និងជានាយកនៃក្លឹប អាយ អេស អាយ ដង្កោសែនជ័យ បានមានប្រសាសន៍ថា៖

«យើងមានសេចក្តីរីករាយក្នុងការស្វាគមន៍ ក្រុមហ៊ុន Smart Axiata ក្នុងនាមជាដៃគូយុទ្ធសាស្ត្ររបស់ក្លឹបបាល់ទាត់ អាយ អេស អាយ ដង្កោ សែនជ័យFC។ កិច្ចសហការនេះគឺជាការបោះជំហានដំបូងនៃភាពជាដៃគូយុទ្ធសាស្ត្រដ៏ទូលំទូលាយរវាងស្ថាប័នទាំងពីរដែលមានការប្តេជ្ញាចិត្តរួមចំពោះការពង្រឹងនវានុវត្តន៍ ការអភិវឌ្ឍសហគមន៍ និងការកសាងសហគមន៍កម្ពុជាឱ្យកាន់តែប្រសើរ។ យើងមានក្តីរីករាយក្នុងការចាប់ផ្ដើមដំណើររួមគ្នាមួយនេះ តាមរយៈវិស័យកីឡាបាល់ទាត់ ហើយយើងនឹងស្វែងរកឱកាសថ្មីៗសម្រាប់កិច្ចសហការបន្ថែមទៀតនាពេលអនាគត»។

ខណៈដែលការឧបត្ថម្ភដល់ក្លឹបបាល់ទាត់ អាយ អេស អាយ ដង្កោសែនជ័យ FC គឺជាកិច្ចសហការដំបូងដែលត្រូវបានប្រកាសនៅថ្ងៃនេះ អង្គភាពទាំងពីរចាត់ទុកថានេះជាជំហានចាប់ផ្តើមនៃភាពជាដៃគូយុទ្ធសាស្ត្រដ៏ទូលំទូលាយមួយ ដែលនឹងបន្តពង្រីកកិច្ចសហប្រតិបត្តិការលើវិស័យផ្សេងៗនាពេលអនាគត។

អំពី Smart

ក្រុមហ៊ុន Smart Axiata ដែលជាក្រុមហ៊ុនបុត្រសម្ព័ន្ធរបស់ក្រុមហ៊ុន Axiata Group Berhad (ប្រទេសម៉ាឡេស៊ី) ផ្តល់ជូននូវសេវាទំនាក់ទំនង 5G និងដំណោះស្រាយបច្ចេកវិទ្យាព័ត៌មាន និងសារគមនាគមន៍ (ICT) ចម្រុះ​នៅទូទាំង​ប្រទេសកម្ពុជា ដោយបម្រើអតិថិជនជិត 8 លាននាក់។ ក្នុងនាមជាម៉ាកយីហោបច្ចេកវិទ្យាទូរស័ព្ទ និងឌីជីថលដ៏​ទូលំទូលាយ ក្រុមហ៊ុន Smart កំពុងផ្លាស់ប្តូរទិដ្ឋភាពឌីជីថលរបស់កម្ពុជា តាមរយៈការជួយបង្កើនផលិតភាព ការលើកកម្ពស់របៀបរស់នៅបែបឌីជីថល និងការគាំទ្រកំណើនសេដ្ឋកិច្ចប្រកបដោយបរិយាបន្ន ដោយបាន​បញ្ជៀប​ចីរភាពទៅក្នុងការអនុវត្តការងារ តាមរយៈការពង្រីកបណ្តាញប្រកបដោយការទទួលខុសត្រូវ បរិយាបន្នឌីជីថល និងនវានុវត្តន៍។  

ក្រោមការគាំទ្រពីក្រុមហ៊ុន Axiata Group Berhad ដែលជាក្រុមហ៊ុនទូរគមនាគមន៍ឈានមុខគេមួយ​នៅអាស៊ីអាគ្នេយ៍ ក្រុមហ៊ុន Smart គឺជាសហគ្រាសម៉ាឡេស៊ីដ៏សំខាន់មួយដែលទទួលបានវិនិយោគទន់មួយ​ភាគធំពីមូលនិធិទ្រព្យសម្បត្តិអធិបតេយ្យភាពរបស់រដ្ឋាភិបាលម៉ាឡេស៊ី។ ការជ្រោមជ្រែងនេះ ជួយជម្រុញ​ឲ្យ​ក្រុមហ៊ុន Smart ប្រកាន់ខ្ជាប់នូវស្តង់ដារអភិបាលកិច្ចល្អ និងការរីកចម្រើនប្រកបដោយការទទួលខុសត្រូវ ដែលរួម​ចំណែក​យ៉ាងសំខាន់​ដល់ការអភិវឌ្ឍសេដ្ឋកិច្ច សង្គម និងឌីជីថលរបស់កម្ពុជា។  

អំពី ISI Group

ចាប់តាំងពីការបង្កើតឡើងក្នុងឆ្នាំ ១៩៩៧ ជាសហគ្រាសគ្រួសារតូចមួយដែលផ្តោតលើការកែច្នៃ និងផលិតដំបូលដែក ISI Group បានរីកចម្រើនក្លាយជាក្រុមហ៊ុនឈានមុខមួយក្នុងចំណោមក្រុមហ៊ុនឯកជនធំៗនៅកម្ពុជា។ តាមរយៈការពង្រីកអាជីវកម្មទៅកាន់វិស័យជាច្រើន ក្រុមហ៊ុនបានបន្តអភិវឌ្ឍដំណោះស្រាយប្រកបដោយនវានុវត្តន៍ គុណភាព និងនិរន្តរភាព ដើម្បីចូលរួមលើកកម្ពស់គុណភាពជីវិត និងការអភិវឌ្ឍសង្គមកម្ពុជា។ 

សព្វថ្ងៃ ISI Group គឺជាក្រុមហ៊ុនឈានមុខគេមានវត្តមាននៅក្នុងវិស័យសំខាន់ៗជាច្រើន រួមមាន ឧស្សាហកម្មដែក និងសម្ភារសំណង់ សំណង់ និងវិស្វកម្ម តំបន់ឧស្សាហកម្មចម្រុះ អចលនទ្រព្យ និងអាហារ និងភេសជ្ជៈ។ 

តាមរយៈរោងចក្រផលិតទំនើប និងប្រព័ន្ធគ្រប់គ្រងស្តង់ដារអន្តរជាតិ ISI Group បាននាំយកសម្ភារសំណង់ និងដំណោះស្រាយថ្មីៗមកកាន់ទីផ្សារកម្ពុជា ជួយបង្កើនប្រសិទ្ធភាព គុណភាព និងសុវត្ថិភាពក្នុងការសាងសង់។ ជាមួយការទទួលយកបច្ចេកវិទ្យាថ្មី និងការអភិវឌ្ឍសមត្ថភាពជាបន្តបន្ទាប់ ក្រុមហ៊ុនអាចផ្តល់ជូននូវផលិតផល និងសេវាកម្មដ៏គ្រប់ជ្រុងជ្រោយ ស្របតាមតម្រូវការរបស់អតិថិជន និងទីផ្សារដែលកំពុងវិវត្ត។ 

ដោយពឹងផ្អែកលើសមត្ថភាព និងបទពិសោធន៍របស់ខ្លួន ISI Group បានក្លាយជាក្រុមហ៊ុនដំបូងគេនៅកម្ពុជាដែលជាអ្នកឯកទេសសំណង់ និងបានពង្រីកខ្លួនចូលទៅក្នុងវិស័យអចលនទ្រព្យ ដោយផ្តោតលើការរចនាដែលលើតម្រូវការអតិថិជនជាចម្បង។ គម្រោងអចលនទ្រព្យរបស់ក្រុមហ៊ុនរួមមាន អគារខ្ពស់ៗ មជ្ឈមណ្ឌលពាណិជ្ជកម្មសម្រាប់សហគមន៍ និងសហគមន៍លំនៅឋានដែលរៀបចំផែនការយ៉ាងមានចីរភាព និងទទួលស្គាល់ពី គុណភាព។ 

ក្នុងវិស័យអាហារ និងភេសជ្ជៈ ISI Group ក៏មានភាពល្បីល្បាញជាមួយការបង្កើតហាងកាហ្វេដ៏ល្បីផងដែរ  សម្រាបជួបជុំ ការភ្ជាប់ទំនាក់ទំនង និងការរស់នៅប្រកបដោយគុណភាព។ 

ក្នុងដំណើររីកចម្រើនជិតបីទសវត្សរ៍នេះ ISI Group នៅតែប្រកាន់ខ្ជាប់នូវគុណតម្លៃស្នូល គឺភាពស្មោះត្រង់ ការទទួលខុសត្រូវ ការច្នៃប្រឌិត និងការយកចិត្តទុកដាក់ចំពោះអតិថិជន។ ក្រុមហ៊ុនបន្តពង្រឹងអភិបាលកិច្ចសាជីវកម្ម លើកកម្ពស់ការអនុវត្តអាជីវកម្មប្រកបដោយនិរន្តរភាព និងចូលរួមអភិវឌ្ឍសហគមន៍តាមរយៈគម្រោងដែលមានឥទ្ធិពលវិជ្ជមានលើសង្គម និងបរិស្ថាន។ 

ជាមួយនឹងទស្សនវិស័យក្នុងការកសាងអនាគតដែលប្រសើរជាងមុន ISI Group ប្តេជ្ញាបន្តបង្កើតតម្លៃរយៈពេលវែងសម្រាប់បុគ្គលិក អតិថិជន ដៃគូអាជីវកម្ម និងសង្គមទាំងមូល ដោយជឿជាក់ថា ការកសាងជីវិតកាន់តែប្រសើរ គឺជាមូលដ្ឋាននៃភាពជោគជ័យប្រកបដោយនិរន្តរភាពសម្រាប់មនុស្សគ្រប់រូប។