ដំណឹងនៃការបាត់ខ្លួនរបស់នារីវ័យ២០ឆ្នាំ ជនជាតិសិង្ហបុរីម្នាក់ បានធ្វើឲ្យអ្នកលេងបណ្ដាញសង្គមមានការចាប់អារម្មណ៍ជាខ្លាំង ដោយសារតែនាងបានគេចខ្លួនមកប្រទេសកម្ពុជា។ ស្របពេលដែលបរទេសមានការគិតអវិជ្ជមានមកលើការបាត់ខ្លួនមួយនេះ ប៉ូលីសកម្ពុជាក៏បានរកឃើញនាងយ៉ាងមានសុវត្ថិភាព។

បន្ទាប់ពីមានការស្នើសុំអន្តរាគមន៍ពីឪពុកម្តាយរបស់នាង អាជ្ញាធរអនុវត្តច្បាប់ក្រោមក្រសួងមហាផ្ទៃ រួមទាំងអគ្គនាយកដ្ឋានអន្តោប្រវេសន៍ និងស្នងការដ្ឋាននគរបាលរាជធានីភ្នំពេញ បានចាប់ផ្តើមប្រតិបត្តិការសម្របសម្រួលមួយភ្លាមៗ ដើម្បីស្វែងរកនាង។

ក្រោយមក ប៉ូលីសកម្ពុជាបានរកឃើញនាងស្នាក់នៅក្នុងអគារខុនដូមួយ ជាកន្លែងដែលនាងបានបញ្ជាក់ថា នាងមិនមែនជាជនរងគ្រោះនៃការជួញដូរមនុស្ស ឬការរំលោភបំពានណាមួយឡើយ។

នាងបានពន្យល់ថា ហេតុការណ៍នេះកើតចេញពីបញ្ហាគ្រួសារផ្ទាល់ខ្លួន ដែលនាំឱ្យនាងធ្វើដំណើរមកប្រទេសកម្ពុជា និងកាត់ផ្តាច់ទំនាក់ទំនងទាំងអស់ជាមួយក្រុមគ្រួសាររបស់នាង។

ឥឡូវនេះនាងមានសុវត្ថិភាព ហើយកំពុងទទួលបានការថែទាំ និងជំនួយសមស្របពីអាជ្ញាធរកម្ពុជាដែលមានសមត្ថភាព។

ប្រភពពី៖ ក្រុមអ្នកនាំពាក្យក្រសួងមហាផ្ទៃ