អាមេរិក និងចិន ផ្អាកការដំឡើងពន្ធគយដាក់គ្នាទៅវិញទៅមករយៈពេល ៩០ថ្ងៃ

អន្តរជាតិ៖ សហរដ្ឋអាមេរិក និងចិនបាននិយាយកាលពីថ្ងៃចន្ទថា ពួកគេបានយល់ព្រមផ្អាករយៈពេល ៩០ថ្ងៃលើ ពន្ធសងសឹក ដ៏ច្រើនដែលដាក់គ្នាទៅវិញទៅមក ចាប់តាំងពីដើមខែមេសា នៅពេលដែលប្រធានាធិបតី លោក Trump បានប្រកាសពីផែនការពន្ធពិភពលោកដ៏ធំធេងរបស់លោក និងបានបញ្ឆេះសង្គ្រាមពាណិជ្ជកម្មរបស់លោកជាមួយប្រទេសចិន។

ប្រទេសដែលមានសេដ្ឋកិច្ចធំជាងគេទាំងពីរបានចេញសេចក្តីថ្លែងការណ៍រួមនាពេលយប់ ដែលពួកគេសន្យាថានឹងបន្តធ្វើការឆ្ពោះទៅរកកិច្ចព្រមព្រៀងពាណិជ្ជកម្មយូរអង្វែង ខណៈពេលដែលកាត់បន្ថយពន្ធគយក្នុងពេលនេះ។ ទីផ្សារភាគហ៊ុននាពេលខាងមុខបានហក់ឡើងបន្ទាប់ពីព័ត៌មាននៃកិច្ចព្រមព្រៀង។

នៅក្រោមកិច្ចព្រមព្រៀងនេះ សហរដ្ឋអាមេរិកនឹងកាត់បន្ថយអត្រាពន្ធលើទំនិញរបស់ចិនពី ១៤៥ភាគរយមក ៣០ភាគរយ ខណៈដែលប្រទេសចិនបានយល់ព្រមបញ្ចុះអត្រាពន្ធលើទំនិញអាមេរិកពី ១២៥ភាគរយមកត្រឹម ១០ភាគរយ។

ប្រទេសចិន ក៏បានយល់ព្រមផ្អាក ឬលុបចោលវិធានការតបតវិញដែលមិនយកពន្ធលើសហរដ្ឋអាមេរិក ចាប់តាំងពីដើមខែមុន។ នេះបើយោងតាមរបាយការណ៍របស់សេតវិមានស្តីពីកិច្ចព្រមព្រៀង។

តំណាងពាណិជ្ជកម្មអាមេរិក លោក Jamieson Greer និងរដ្ឋមន្រ្តីក្រសួងរតនាគារអាមេរិក លោក Scott Bessent បានប្រកាសពីកិច្ចព្រមព្រៀងនេះនៅក្នុងសន្និសីទសារព័ត៌មាននៅទីក្រុងហ្សឺណែវ។ ដំណឹងនេះបានកើតឡើងបន្ទាប់ពីមន្ត្រីនៃប្រទេសទាំងពីរបានជួបប្រជុំគ្នាកាលពីចុងសប្តាហ៍នេះជាលើកដំបូងចាប់តាំងពីសង្រ្គាមពាណិជ្ជកម្មបានចាប់ផ្តើមចូលរួមក្នុងកិច្ចពិភាក្សាពាណិជ្ជកម្ម។

យោងតាមសារព័ត៌មាន The Associated Press លោក Bessent បាននិយាយថា "ការឯកភាពគ្នាពីគណៈប្រតិភូទាំងពីរនៅចុងសប្តាហ៍នេះ គឺមិនមានភាគីណាមួយចង់ឱ្យមានការបំបែកគ្នានោះទេ"។ "ហើយអ្វីដែលបានកើតឡើងជាមួយនឹងពន្ធដ៏ខ្ពស់ទាំងនេះ ... គឺជាការហ៊ុមព័ទ្ធ ដែលស្មើនឹងការហ៊ុមព័ទ្ធ។ ហើយភាគីទាំងពីរមិនចង់បាននោះទេ។ យើងចង់បានពាណិជ្ជកម្ម។"

លោក បានបន្តថា យើងចង់បានពាណិជ្ជកម្មដែលមានតុល្យភាពជាងមុន។ ហើយខ្ញុំគិតថាភាគីទាំងពីរមានការប្តេជ្ញាចិត្តក្នុងការសម្រេចបាននូវនោះ។

សេចក្តីថ្លែងការណ៍រួមរបស់សហរដ្ឋអាមេរិក និងចិនបានលើកឡើងថា លោក Greer និង លោក Bessent នឹងតំណាងឱ្យសហរដ្ឋអាមេរិកនៅក្នុងកិច្ចចរចាពាណិជ្ជកម្មសម្រាប់រយៈពេលបីខែខាងមុខ ហើយលោក He Lifeng អនុប្រធានក្រុមប្រឹក្សារដ្ឋនឹងតំណាងឱ្យប្រទេសចិន។

បើតាមសេចក្តីថ្លែងការណ៍រួមបានលើកឡើងថា ការពិភាក្សាទាំងនេះអាចធ្វើឡើងឆ្លាស់គ្នានៅក្នុងប្រទេសចិន និងសហរដ្ឋអាមេរិក ឬប្រទេសទីបីតាមការព្រមព្រៀងរបស់ភាគី។ តាមតម្រូវការ ភាគីទាំងពីរអាចធ្វើការពិគ្រោះកម្រិតការងារលើបញ្ហាសេដ្ឋកិច្ច និងពាណិជ្ជកម្មដែលពាក់ព័ន្ធ។

គួរបញ្ជាក់ថា ពន្ធ ១៤៥ភាគរយលើប្រទេសចិនត្រូវបានដាក់នៅថ្ងៃទី៩ ខែមេសានៅពេលដែល លោក Trump បានអនុវត្តការផ្អាករយៈពេល ៩០ថ្ងៃលើពន្ធ "ទៅវិញទៅមក" លើប្រទេសផ្សេងទៀតក្នុងមួយសប្តាហ៍បន្ទាប់ពី "ថ្ងៃរំដោះ"។

ក្រោយមកកាលពីថ្ងៃចន្ទ លោក Trump បានហៅកិច្ចព្រមព្រៀងនេះថាជា "ការកំណត់ឡើងវិញទាំងស្រុង" ជាមួយប្រទេសចិន ហើយបាននិយាយថា កិច្ចព្រមព្រៀងនេះមិនរួមបញ្ចូលពន្ធដែលមានស្រាប់នោះទេ ពន្ធលើរថយន្ត ដែក និងអាលុយមីញ៉ូម ឬពន្ធដែលអាចនឹងត្រូវដាក់លើឱសថ។

លោក Trump បាននិយាយថា "កិច្ចពិភាក្សានៅទីក្រុងហ្សឺណែវមានភាពរួសរាយរាក់ទាក់ ទំនាក់ទំនងគឺល្អខ្លាំងណាស់។ យើងមិនមើលទៅធ្វើឱ្យប៉ះពាល់ដល់ប្រទេសចិនទេ។ ប្រទេសចិនកំពុងរងការឈឺចាប់យ៉ាងខ្លាំង"។ លោក​ បានបន្ត​ថា ​គ្រោង​នឹង​ពិភាក្សា​ជាមួយ​ប្រធានាធិបតី​ចិន លោក Xi Jinping នៅ​ចុង​សប្តាហ៍​នេះ។

លោក Trump បានផ្តល់សញ្ញាក្នុងប៉ុន្មានសប្តាហ៍ថ្មីៗនេះអំពីឆន្ទៈរបស់លោកក្នុងការកាត់បន្ថយអត្រាពន្ធលើប្រទេសចិនដោយនិយាយថា ១៤៥ភាគរយ គឺខ្ពស់ពេកក្នុងការដាក់លើដៃគូពាណិជ្ជកម្ម។ លោក បានព្យាយាមកាត់បន្ថយសង្រ្គាមពាណិជ្ជកម្មជាមួយទីក្រុងប៉េកាំង ហើយមានសុទិដ្ឋិនិយមថា លោកអាចធ្វើកិច្ចព្រមព្រៀងពាណិជ្ជកម្មជាមួយប្រធានាធិបតីចិន លោក Xi Jinping៕

ប្រភព៖ The Hill

ប្រែសម្រួលដោយ៖ MD-Angkor