សញ្ញាបង្ហាញថា មានមនុស្សកំពុងនឹកដល់អ្នក!

កម្សាន្ត៖ តើអ្នកនឹងដឹងដោយរបៀបណា ប្រសិនបើមាននរណាម្នាក់កំពុងគិតពីអ្នក? ឬពិសេសជាងនេះទៅទៀត អ្នកពិតជាចង់ដឹងថា តើគេមានកូនចិត្តលួចគិតដល់អ្នក ឬអត់?

ដូច្នេះ អ្នកមិនចាំបាច់ឆ្ងល់ទៀតទេ អ្វីដែលអ្នកត្រូវធ្វើគឺ មកមើលអត្ថបទខាងក្រោម បន្ទាប់មករកមើលថា តើមានសញ្ញាមួយចំនួនណាខ្លះ ដែលអាចជួយឲ្យអ្នកទទួលបានអារម្មណ៍ដឹងមុនថា មាននរណាម្នាក់កំពុងគិតអំពីអ្នក? តើគេគិតល្អឬគិតអាក្រក់?

សញ្ញាទាំងនោះ មានដូចខាងក្រោម៖

១.អ្នកប្រទះនូវអារម្មណ៍ខ្លះដែលនឹកស្មានមិនដល់

អ្នកប្រហែលជានៅកន្លែងធ្វើការ ហើយធ្វើការយ៉ាងរវល់បំផុត ឬនៅឯពិធីជប់លៀង និងរាំលេងសើចសប្បាយសុខៗ តែស្រាប់តែអ្នកបែរជាមានអារម្មណ៍សោកសៅ ឬអារម្មណ៍រំជើបរំជួលអ្វីមួយ កើតឡើងលើអ្នកភ្លាមៗ។ នេះ​ប្រហែល​ជា​សញ្ញាបង្ហាញ​ថា​ មាន​នរណា​ម្នាក់​នឹក​អ្នក​ហើយ។ ប្រហែលជាគេម្នាក់នោះ ស្រលាញ់អ្នក ដូច្នេះហើយអវត្តមានរបស់អ្នក ធ្វើឲ្យពួកគេប៉ះពាល់អារម្មណ៍យ៉ាងខ្លាំង។ ឬម្យ៉ាងទៀត បើអ្នកមានការថប់បារម្ភ ឬស្ត្រេសសុខៗ តែស្រាប់តែភ្លាមៗនោះ អ្នកមានអារម្មណ៍កក់ក្ដៅខ្លះ នៅក្នុងខ្លួនឡើងវិញ នេះ​ជា​សញ្ញា​បង្ហាញ​ថា ​មាន​នរណា​ម្នាក់​យក​ចិត្ត​ទុក​ដាក់​ចំពោះ​អ្នក ហើយ​គំនិត​របស់​គេ​ពោរពេញ​ទៅ​ដោយ​ក្ដី​ស្រលាញ់ និង​ការ​យក​ចិត្ត​ទុក​ដាក់ ចំពោះអ្នក ពីចំងាយ។

២.ការញាក់ភ្នែកម្ខាង

ជាក់ស្តែង ប្រសិនបើអ្នកមានប្រតិកម្មអាលែហ្សី ឬអ្នកមានភាពរសើបក្នុងភ្នែក នេះមិនមែនជាសញ្ញាផ្លូវចិត្តទេ ហើយអ្នកគួរតែទៅជួបគ្រូពេទ្យប្រសើរជាង។ ទោះជាយ៉ាងណាក៏ដោយ ប្រសិនបើភ្នែករបស់អ្នកញាក់ វាអាចមានន័យថាមាននរណាម្នាក់ មានគំនិតទាក់ទងនឹងអ្នក។ យោងតាមវិធីសាស្រ្តមួយចំនួន ការញាក់ភ្នែក បង្ហាញពីគំនិតបែបណាដែលអ្នកដទៃមានចំពោះអ្នក។ នេះខុសគ្នារវាងស្ត្រីនិងបុរស។ នោះមានន័យថាប្រសិនបើភ្នែកខាងឆ្វេងរបស់ស្ត្រីញាក់ ប្រហែលជាមាននរណាម្នាក់សរសើរនាង។ ប៉ុន្តែ​ប្រសិនបើ​នាង​ទទួលបាន​សញ្ញា​នេះ​ នៅ​ភ្នែក​ខាងស្តាំ ប្រហែលជា​មាន​នរណាម្នាក់​គិតមិនល្អជាមួយនាង​​។ ហើយសម្រាប់បុរស ការញាក់ភ្នែកវាមានវិធីផ្សេងទៀត។

៣.ថ្ពាល់ ឬ ត្រចៀករបស់អ្នកឡើងក្រហម

ស្រដៀងគ្នានេះដែរ ប្រសិនបើមិនមានហេតុផលរាងកាយសម្រាប់បាតុភូតទាំងនេះទេ អ្នកស្ថិតនៅក្នុងគំនិត ឬនៅក្នុងការនិយាយរបស់នរណាម្នាក់។ ប្រសិនបើថ្ពាល់របស់អ្នកឡើងក្រហមដោយគ្មានហេតុផលណាមួយ (ជាក់ស្តែងមិនមែននៅពេលអ្នកផឹកស្រា ឬមានអ្នកមកញ៉ែ) អ្នកប្រហែលជាត្រូវបាននរណាម្នាក់និយាយអាក្រក់។ ពណ៌នៅលើថ្ពាល់ គឺដូចជាការទះកំផ្លៀងពីចម្ងាយ ហើយបុគ្គលម្នាក់នោះ មានគំនិតឈ្លានពានចំពោះអ្នក។ ម៉្យាងវិញទៀត ក្ដៅត្រចៀក គឺជាសញ្ញាមួយដែលថា មាននរណាម្នាក់មានចិត្តស្រលាញ់អ្នក ហើយអ្នកទទួលយកអារម្មណ៍នោះបានយ៉ាងល្អណាស់!

៤.ព្រឺសម្បុរ

នេះ​ជា​សញ្ញា ​បញ្ជាក់​ថា​អ្នក​ស្ថិត​នៅ​កណ្តាល​នៃ​អារម្មណ៍​ និង​ការ​គិត​ដែលមានការរំ​ពឹងទុក​ខ្លាំង។ រីឯគំនិតវិជ្ជមាន ឬអវិជ្ជមាន វាអាស្រ័យលើអារម្មណ៍របស់អ្នក ។ វាប្រហែលជាប្រសើរណាស់ ដែលមានមនុស្សម្នាក់ រកឃើញថាអ្នកមានភាពទាក់ទាញមិនធម្មតា។ ប្រសិនបើគំនិតរបស់នរណាម្នាក់ អាចមានឥទ្ធិពលបែបនេះមកលើអ្នក នោះមានន័យថាបុគ្គលនេះមានថាមពលផ្លូវចិត្តដ៏អស្ចារ្យ ទោះជាល្អ ឬអាក្រក់ក៏ដោយ។ គេចេះវាយតម្លៃស្ថានភាព និងមើលពីរបៀបដែលអ្នកអាចដោះស្រាយវាបាន។

៥.កណ្ដាស់ភ្លាមៗ

នេះគឺជាសញ្ញាធម្មតា ដែលថាមាននរណាម្នាក់នឹកអ្នក។ នៅក្នុងប្រទេសជាច្រើន ប្រជាជនតែងតែមានជំនឿលើរឿងនេះ ដោយគេគិតថា ឲ្យតែពេលយើងកណ្ដាស់ ប្រហែលជាមាននរណាម្នាក់ គិតដល់យើង ឬនិយាយអ្វីទាក់ទងជាមួយយើងមិនខាន។

៦.ការត្អើក

នេះ​ជា​សញ្ញា​ដែលបង្ហាញថា ​មាន​នរណា​ម្នាក់​កំពុង​និយាយដើមអំពី​អ្នក​ឥត​ឈប់ឈរ។ ថ្វីត្បិតតែបុគ្គលនេះ មិនមានភាពសាហាវឃោរឃៅក៏ដោយ ប៉ុន្តែសកម្មភាពរបស់គេ គឺយ៉ាប់ និងនិយាយបង្កាច់បង្ខូចអ្នក។ ដូច្នេះចូរព្យាយាម​ចៀស​វាង​មនុស្ស​ម្នាក់​នេះ បើ​អ្នក​ដឹង​ថាគេ​ជា​នរណា។

ប្រភព៖ themindsjournal