ទីបំផុត Xiaomi បានប្រកាសថ្ងៃ បើកបង្ហាញឧបករណ៍ថ្មី ទំនងជាបញ្ចេញស៊េរីទូរសព្ទ 12T

បរទេស៖ បន្ទាប់ពីបានបញ្ចេញស៊េរីទូរសព្ទ Xiaomi 12S នៅក្នុងប្រទេសចិន កាលពីខែកក្កដា ទីបំផុតក្រុមហ៊ុន Xiaomi បានកំណត់សម្រាប់អ្វីដែលអាចជាព្រឹត្តិការណ៍សម្ពោធសកល ដ៏ធំចុងក្រោយរបស់ខ្លួន សម្រាប់ឆ្នាំនេះ។ ឥឡូវនេះ ក្រុមហ៊ុនបានបញ្ជាក់ពីកាលបរិច្ឆេទនៃការប្រកាសបង្ហាញជាក់លាក់ សម្រាប់សប្ដាហ៍ក្រោយ ជាមួយនឹងឧបករណ៍មួយចំនួនដែលគេរំពឹងថា នឹងត្រូវបានបញ្ចេញនៅពេលនោះ។

ក្រុមហ៊ុន Xiaomi បានបញ្ជាក់អំពីផែនការរបស់ខ្លួន្ ក្នុងការរៀបចំព្រឹត្តិការណ៍សម្ពោធជាសកល នៅថ្ងៃទី4 ខែតុលា។ រូបភាព teaser ដែលត្រូវបានចែករំលែក បានដាក់ចំណងជើងថា "Make Moments Mega" ដែលអាចប្រាប់ពីព្រឹត្តិការណ៍ ដែលផ្ដោតលើកាមេរ៉ា។ វាទំនងជាសំដៅទៅលើ Xiaomi 12T Pro ដែលត្រូវបានគេរំពឹងថា នឹងមានកាមេរ៉ាទំហំ 200MP របស់វា។

យ៉ាងណាមិញ ព័ត៌មានលម្អិតនៃ Xiaomi 12T និង 12T Pro បានលេចធ្លាយរួចមកហើយ។ បន្ថែមពីនេះ ទូរសព្ទលំដាប់ premium នេះទំនងជាមកអមជាមួយនឹងការបញ្ចេញថេប្លេត Redmi Pad។ នាឡិកាឆ្លាត Xiaomi Smart Band 7 Pro ក៏អាចនឹងលេចវត្តមានផងដែរ ដែលជាកំណែសកលនៃ Xiaomi Band 7 Pro៕

ប្រភព: Notebookcheck