បរទេស៖ វាស្ដាប់មើលទៅហាក់ដូចជាចេញពីខ្សែភាពយន្តបែបរ. ន្ធ- ត់អ៊ីចឹង ប៉ុន្តែតាមពិតទៅ វាមកពីក្នុងទីអវកាសដ៏សែនជ្រៅ។ ទីភ្នាក់ងារអវកាសអាមេរិក NASA បានបញ្ចេញនូវអ្វី ដែលគេហៅថា (remix sonification) នៃប្រហោងខ្មៅមួយ។ អ្នកវិទ្យាសាស្ត្របាននិយាយថា ចាប់តាំងពីឆ្នាំ២០០៣ ប្រហោងខ្មៅនៅចំណុចកណ្ដាលនៃបណ្ដុំកាឡាក់ស៊ី Perseus ត្រូវបានបង្ហាញថា មានជាប់ទាក់ទងជាមួយនឹងសំឡេង។

ក្រុមតារាវិទូបានរកឃើញរលកសម្ពាធ ដែលបញ្ជូនចេញដោយប្រហោងខ្មៅ ដែលបណ្ដាលឲ្យមានរលកក្នុងឧស្ម័ន ដែលទីបំផុតបានបកប្រែពួកវាទៅជាណូតមួយ។ NASA បាននិយាយនៅលើបណ្ដាញសង្គម Twitter ថា៖ «ការយល់ខុសដែលថា មិនមានសំឡេងនៅក្នុងទីអវកាស ត្រូវបានបង្កើតឡើងដោយសារលំហគឺជាសុញ្ញកាស ដែលគ្មានផ្លូវសម្រាប់រលកសំឡេងដើម្បីធ្វើដំណើរ»។ អ្នកវិទ្យាសាស្ត្របាននិយាយថា រលកសំឡេងអាចស្ដាប់បានជាលើកដំបូង ដោយការពង្រីកនិងលាយជាមួយនឹងទិន្នន័យផ្សេងទៀត។

NASA បាននិយាយទៀតថា៖ «ពួកវាកំពុងត្រូវបានគេស្ដាប់ឮបាន ១៤៤ក្វាទ្រីលាន និង២៨៨ក្វាទ្រីលានដង ខ្ពស់ជាងប្រេកង់ដើមរបស់ពួកវា។ ការស្កេនដូចរ៉ាដាជុំវិញរូបភាព អាចឲ្យអ្នកឮរលកដែលបញ្ចេញក្នុងទិសដៅផ្សេងគ្នា»។ បណ្ដុំកាឡាក់ស៊ីដូចជា Perseus មានឧស្ម័នច្រើនក្រៃលែងដែលព័ទ្ធជុំវិញកាឡាក់ស៊ីនានាខាងក្នុង ដែលផ្ដល់មធ្យោបាយដែលរលកសំឡេងអាចធ្វើដំណើរបាន។

NASA ក៏ថែមទាំងដាក់សំឡេងចេញពីភពក្រៅផ្សេងៗ ដែលពួកគេបានរកឃើញផងដែរ។ ទីភ្នាក់ងារអវកាសនេះបានបង្ហោះ សំឡេងភពក្រៅចំនួន៥,០០០ នៅលើបណ្ដាញសង្គម Twitter ដែលត្រូវបានតំណាងដោយសទ្ទសញ្ញា (ណូតភ្លេង)។ អ្នកអាចចុចស្ដាប់សំឡេងផ្សេងៗទៀតពីចក្រវាល នៅទីនេះ៕

ប្រភព: Fox Weather