ឌូបៃ៖ កាលពីថ្ងៃសុក្រទី២៥ ខែមីនា ឆ្នាំ២០២២កន្លងទៅថ្មីៗនេះ ត្បូងពេជ្រដែលមានរហស្សនាមថា The Rock បានដាក់តាំងបង្ហាញជាលើកដំបូងនៅឯ Christie's Dubai របស់ទីក្រុងឌូបៃ នៃប្រទេសអារ៉ាប់រួម មុនពេលដេញថ្លៃ និងត្រូវបានគេរំពឹងថា វានឹងអាចប្រមូលបានប្រាក់រហូតដល់ទៅ៣០លានដុល្លារអាមេរិកឯណោះ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សតាមប្រភពព័ត៌មានបានឲ្យដឹងថា ត្បូងពេជ្រនេះ មានទម្ងន់២២៨.៣១ការ៉ាត់ ត្រូវបានគេជីកយករ៉ែ និងបូលានៅអាហ្វ្រិកខាងត្បូងកាលពីជាង២០ឆ្នាំមុន និងជាពេជ្រពណ៌សដ៏ធំបំផុតមិនធ្លាប់មាន មកដាក់ដេញថ្លៃ។ ហើយរយៈពេលបីថ្ងៃប៉ុណ្ណោះ ដែលវាដាក់តាំងបង្ហាញនៅទីក្រុងឌូបៃ គិតចាប់ពីថ្ងៃទី២៦ ដល់ទី២៩ ខែមីនានេះ និងបន្ទាប់មកទៀត វានឹងធ្វើដំណើរទៅកាន់ទីក្រុងញូវយ៉ក តៃប៉ិ រួមទាំងហ្សឺណែវ។
លោក Rahul Kadakia ប្រធានផ្នែកគ្រឿងអលង្ការអន្តរជាតិនៅ Christie's បានប្រាប់ AFP ឲ្យដឹងដែរថា៖
មជ្ឈឹមបូព៌ាតែងតែមានការកោតសរសើរយ៉ាងខ្លាំងចំពោះគ្រឿងអលង្ការ និងត្បូងសំខាន់ៗ ហើយយើងគិតថាវាជាការល្អសម្រាប់យើងក្នុងការដាក់លក់ត្បូងពេជ្រនៅតំបន់ដែលមានអ្នកប្រមូលត្បូងដ៏អស្ចារ្យជាច្រើនសម្រាប់ត្បូងសំខាន់ៗនៃធម្មជាតិនេះ។
យ៉ាងណាមិញ ចំពោះការដេញថ្លៃ នឹងធ្វើឡើងនៅថ្ងៃទី១១ ខែឧសភា ឆ្នាំ២០២២ខាងមុខនេះ ខណៈកំណត់ត្រាដេញថ្លៃពីមុនសម្រាប់ត្បូងពេជ្រគ្មានពណ៌ដ៏ធំបំផុត១៦៣.៤១ការ៉ាត់ បានដាក់ដេញថ្លៃកាលពីខែវិច្ឆិកា ឆ្នាំ២០១៧ ក្នុងតម្លៃ៣៣.៧លានដុល្លារអាមេរិក៕
ប្រភព: Bangkok Post
សូមទស្សនារូបភាពខាងក្រោម៖
Bong I.T