កំពូលស្មាតហ្វូនមួយនេះ របស់ Motorola អាចនឹងបំពាក់កាមេរ៉ាគោល ទំហំរហូតទៅដល់ 200MP

បរទេស៖ ប្រភព TechnikNews បានរកឃើញភស្ដុតាងនៃស្មាតហ្វូនរបស់ Motorola ជំនាន់ក្រោយ ដែលមានកូដឈ្មោះថា "Frontier"។ ឧបករណ៍នេះត្រូវបានគេនិយាយថា នឹងមកជាមួយលក្ខណៈសម្បត្តិពិសេសដ៏ខ្លាំង រួមទាំងបន្ទះឈីប Snapdragon ថ្មី, អេក្រង់កោង, ល្បឿន refresh rate ខ្ពស់, ការសាកថ្មលឿន, និងសេនស័រកាមេរ៉ា HP1 ថ្មីរបស់ក្រុមហ៊ុន Samsung ផងដែរ។

ទូរសព្ទនេះនឹងត្រូវបានបំពាក់ដោយឈីបក្រុមហ៊ុន Qualcomm ដែលមានកូដឈ្មោះថា "SM8475" ភ្ជាប់ជាមួយរ៉េម 8GB/12GB និង 128GB/256GB flash storage។ ការលេចធ្លាយផ្សេងទៀតអះអាងថា Motorola Frontier នឹងបំពាក់បន្ទះអេក្រង់កោង FHD+ OLED ទំហំ6.67អ៊ីញ ជាមួយនឹងល្បឿន 144Hz refresh rate។

ផ្នែក hardware កាមេរ៉ារបស់ស្មាតហ្វូននេះត្រូវបានគេរាយការណ៍ថា នឹងបំពាក់សេនស័រគោល HP1 របស់ Samsung ទំហំ 200MP។ វាក៏មានឡេនទូលាយទំហំ 50MP និងកាមេរ៉ា telephoto ទំហំ 12MP។ នៅផ្នែកខាងមុខនៃទូរសព្ទ វានឹងបំពាក់កាមេរ៉ាទំហំ 60MP។

ទូរសព្ទ Motorola Frontier ក៏ត្រូវបានគេនិយាយថា នឹងផ្ដល់នូវល្បឿនសាកថ្មលឿនអស្ចារ្យ រហូតដល់ 125W សាកតាមខ្សែ និង 50W ឥតខ្សែ។ ព័ត៌មានលម្អិតផ្សេងទៀតនៃស្មាតហ្វូន ដូចជាកម្លាំងថាមពលថ្ម, software version, និងអ្វីៗផ្សេងទៀត នៅតែមិនទាន់ដឹងក្នុងពេលនេះ៕

ប្រភព: XDA Developers