អបអរសាទរខួបទី១៦ឆ្នាំ នៃការដាក់ល្ខោន ស្រមោលស្បែកធំរបស់កម្ពុជា ក្នុងបញ្ជីបេតិកភណ្ឌពិភពលោក

រាជធានីភ្នំពេញ៖ ២៥ វិច្ឆិកា ២០០៥- ២៥ វិច្ឆិកា ២០២១ ថ្ងៃនេះ គឺជាថ្ងៃគម្រប់ខួបទី១៦ឆ្នាំ ដែលល្ខោនស្រមោលស្បែកធំរបស់កម្ពុជា បានចុះទៅក្នុងបញ្ជីបេតិកភណ្ឌពិភពលោក។

សូមរំលឹកផងដែលថា ល្ខោន​ស្រមោល​ស្បែក​ធំ គឺជា​សិល្បៈ​ខ្មែរ​មួយបែប​មានកំណើត​តាំង​ពីស​.​វ​ទី ១ មកម្ល៉េះ ។ល្ខោននេះ គឺជាប្រភេទសិល្ប:ល្ខោនខ្មែរដ៏មានវ័យចំណាស់បំផុត នៅក្នុងប្រទេសកម្ពុជា ដែលសល់ពីសម័យបុរាណ ដែលមានចារឹកនៅតាមសិលាចារឹកតាមប្រាសាទ។ ជាក់ស្តែង យោងតាមសិលាចារឹកលេខ K.១៥៥ នៅគោករកា នៅក្នុងសតវត្សរ៍ទី៩ ល្ខោនស្រមោលស្បែកធំ អាចមានដើមកំណើតតាំងពីមុនសម័យអង្គរមកម្ល៉េះ។

ភាពល្អឯកនៃទម្រង់ទស្សនីយភាពល្ខោនស្រមោលស្បែកធំរបស់កម្ពុជានេះ បញ្ជាក់​អំពី​សតិ​ប្រាជ្ញា​ដ៏​ភ្លឺស្វាង និង​គំនិត​ច្នៃប្រឌិត​ដ៏​កំពូលរបស់បុព្វបុរសខ្មែរ ដែល​បង្កើត​សិល្បៈ​នេះ​ឡើង ឲ្យ​ក្លាយទៅជា​ទស្សនីយភាព​មួយ​ដ៏​អស្ចារ្យ ។ ដូច្នេះក្នុងនាមយើងជាកូនខ្មែរគួរគប្បីថែរក្សាសម្បត្តិវប្បធម៌ដ៏ល្អឯកមួយនេះ ឲ្យនៅស្ថិតស្ថេរ គង់វង្ស យូរអង្វែងតរៀងទៅ៕