ស្អែកនេះណាសានឹងបាញ់បង្ហោះយាន ត្រៀមបំបុកអាចម៍ផ្កាយ បញ្ចៀសផែនដីពីគ្រោះថ្នាក់ ថ្ងៃខាងមុខ

បរទេស៖ យានអវកាសមួយគ្រោងនឹងត្រូវគេបាញ់បង្ហោះ និងសាកល្បងបច្ចេកវិទ្យាដែលអាចត្រូវការនៅថ្ងៃណាមួយ ដើម្បីបញ្ចៀសពីអាចម៍ផ្កាយដ៏គ្រោះថ្នាក់។ បេសកកម្ម DART របស់ណាសានឹងត្រូវទៅបំបុកអង្គមួយ ឈ្មោះថា Dimorphos ដើម្បីមើលថាតើល្បឿននិងផ្លូវរបស់វា អាចនឹងត្រូវគេផ្លាស់ប្ដូរយ៉ាងណា។

នៅថ្ងៃពុធ រ៉ុក្កែត Falcon 9 នឹងដឹកយានអវកាស Dart ចេញពីមូលដ្ឋានទ័ពអាកាស Vandenberg ក្នុងរដ្ឋកាលីហ្វ័រញ៉ា។ បេសកកម្ម Dart តម្លៃ៣២៥លានដុល្លារនឹងកំណត់គោលដៅលើអាចម៍ផ្កាយមួយគូ ដែលគោចរជិតគ្នា ដែលគេស្គាល់ថាជាអាចម៍ផ្កាយភ្លោះ។ ក្នុងចំណោមអង្គទាំងពីរនេះ អាធំមានឈ្មោះថា Didymos ដែលមានប្រវែងប្រហែល៧៨០ម៉ែត្រ ខណៈអាតូចឈ្មោះថា Dimorphos មានទទឹងប្រហែល១៦០ម៉ែត្រ។

បន្ទាប់ពីការបាញ់បង្ហោះយាន Dart ដំបូងវានឹងត្រូវគេចពីទំនាញផែនដី ដោយនឹងធ្វើដំណើរតាមគន្លងរបស់វាជុំវិញព្រះអាទិត្យ។ បន្ទាប់មក វានឹងទៅស្កាត់អាចម៍ផ្កាយភ្លោះ ខណៈវានឹងស្ថិតនៅក្នុងរយៈចម្ងាយ១០លានគីឡូម៉ែត្រពីផែនដី ក្នុងខែកញ្ញា ឆ្នាំ២០២២។ យាន Dart នឹងបំបុកអាចម៍ផ្កាយ Dimorphos ក្នុងល្បឿន៦.៦គីឡូម៉ែត្រក្នុងមួយវិនាទី។ នេះគួរតែអាចផ្លាស់ប្ដូរល្បឿននៃអង្គនេះ បានមួយផ្នែកនៃមួយមីលីម៉ែត្រក្នុងមួយវិនាទី។ ការផ្លាស់ប្ដូរនេះគឺតិចតួចមែន ប៉ុន្តែវាអាចគ្រប់គ្រាន់ ដើម្បីបញ្ចៀសអង្គនេះ ដើម្បីកុំឲ្យបុកគ្នាជាមួយនឹងផែនដី៕

ប្រភព: BBC