សូមចូលរួមរំលែកទុក្ខ! អតីតតួនាងវិធាវី ក្នុងរឿងផ្កាស្រពោន ឆ្នាំ១៩៦៥ ទទួលមរណភាពហើយ

តារាកម្សាន្ត៖ ជាដំណឹងមរណទុក្ខដ៏សែនក្រៀមក្រំ និងគួរឲ្យសោកស្តាយជាខ្លាំង ក្រោយពេលដែលអតីតសិល្បការិនីល្ខោននិយាយនៃប្រទេសកម្ពុជាសម័យសង្គមរាស្រ្តនិយម និងជាតួនាងវិធាវី ក្នុងខ្សែភាពយន្តរឿង ផ្កាស្រពោន ព្រមទាំងជាអនុប្រធានាការិយាល័យវប្បធម៌ខេត្តបាត់ដំបងទសវត្សឆ្នាំ៩០ លោកស្រី ញ៉ុញ សាណុំ បានទទូលមរណភាពហើយ កាលពីវេលាម៉ោង៦ និង៣០នាទីល្ងាច ថ្ងៃទី១២ ខែវិច្ឆិកា ឆ្នាំ២០២១កន្លងទៅនេះ នាគេហដ្ឋានរបស់លោកស្រីក្បែរសាលាពីរធ្នូ ក្រុងបាត់ដំបង ខេត្តបាត់ដំបង ក្នុងជន្មាយុ៨០ឆ្នាំ ដោយជំងឺមហារីកកូនកណ្តុរ ក្រោយពីលោកស្រីធ្លាក់ខ្លួនឈឺអស់រយ:ពេលជិត៣ខែ។  

សូមរំលឹកផងដែលថា នៅឆ្នាំ១៩៦៥ លោកស្រី ញ៉ុញ សាណុំ បានសម្តែងជាតួនាងវិធាវី តួឯកក្នុងខ្សែភាពយន្តរឿងផ្កាស្រពោន ដែលជាអក្សរសិល្ប៍ដ៏ល្បីល្បាញថ្នាក់ជាតិនិពន្ធដោយ លោក នូ ហាច។ តាមរយៈខ្សែភាពយន្តរឿងផ្កាស្រពោននេះ មហាទស្សនិកជនខ្មែរមិនតិចទេរំជួលចិត្ត​ និងស្ងើចសរសើរពីទេពកោសល្យរបស់លោកស្រី ហើយចងចាំនូវការសម្តែងនេះមិនភ្លេចដល់សព្វថ្ងៃ។

ជាចុងបញ្ជប់ សូមឧទ្ទិសបួងសួងឲ្យដួងវិញ្ញាណក្ខន្ធរបស់វីរ:សិល្បការិនីដ៏ឆ្នើមរបស់កម្ពុជា លោកស្រី ញ៉ុញ សាណុំបានទៅកាន់សុគតិភពកុំបីឃ្លៀងឃ្លាតឡើយ៕