សម្រេចហើយ! ទីបំផុតព្រះនាងជប៉ុន នឹងរៀបអភិសេកជាមួយបុរសសាមញ្ញក្នុងខែតុលានេះ

ជប៉ុន៖ ជាការពិតណាស់ កាលពីថ្មីៗនេះ ព្រះនាង Mako របស់ប្រទេសជប៉ុន និងជាភាតុបុត្រី (ក្មួយស្រី) របស់អធិរាជ Naruhito បានបដិសេធប្រាក់ចំនួន១៥០លានយេន (ប្រមាណ១.៣លានដុល្លារអាមេរិក) ពីរាជវាំង ដើម្បីរៀបអភិសេកជាមួយនឹងបុរសសាមញ្ញម្នាក់ដែលធ្លាប់ជាមិត្តរួមថ្នាក់ និងជានិស្សិតច្បាប់នៃសាកលវិទ្យាល័យរួមគ្នាតាំងពីឆ្នាំ២០១២។ ហើយចំនួនប្រាក់នេះ ត្រូវបានផ្ដល់ដោយរាជវាំង ដើម្បីការពារសេចក្ដីថ្លៃថ្នូររបស់ព្រះនាង ដែលធ្លាប់ជាសមាជិកនៃគ្រួសាររាជវង្ស។

តែទោះជាយ៉ាងណាក៏ដោយ ព្រះនាងបានបដិសេធមិនព្រមទទួលយកប្រាក់ ដោយសាតែភាពស្មុគស្មាញនៃការចម្រូងចម្រាសផ្នែកហិរញ្ញវត្ថុ ទើបជាហេតុធ្វើឲ្យព្រះនាងបង្ខំចិត្តពន្យារពេលរៀបអភិសេកអស់រយៈពេលជាច្រើនឆ្នាំមកនេះ។

យ៉ាងណាមិញ ក្រោយពីភ្ជាប់ពាក្យជាមួយនឹងបុរសសាមញ្ញាក្នុងឆ្នាំ២០១៧មក ព្រះនាងបានសម្រេចហឫទ័យនឹងរៀបអភិសេកនៅថ្ងៃទី២៦ ខែតុលា ឆ្នាំ២០២១នេះតែម្ដង ហើយបន្ទាប់មក ព្រះនាងនឹងយាងទៅរស់នៅក្នុងសហរដ្ឋអាមេរិក ដែលជាកន្លែងបុរសសាមញ្ញធ្វើការជាមេធាវីផងដែរ។

គួររម្លឹកដែរថា តាមច្បាប់របស់ប្រទេសជប៉ុន ព្រះនាង នឹងត្រូវចាកចេញពីគ្រួសាររាជវង្សរបស់ទ្រង់ និងបាត់បង់ទាំងឋានៈជាព្រះនាងទៀតផង ក្រោយពីរៀបអភិសេកជាមួយបុរសសាមញ្ញ៕

ប្រភព: BBC

សូមទស្សនារូបភាពខាងក្រោម៖