បែកធ្លាយថ្ងៃប្រកាសបញ្ចេញ iPhone 13 កាន់តែកៀកមកដល់មែនទែនហើយ

បរទេស៖ ទូរសព្ទ iPhone 13 នឹងត្រូវប្រកាសនៅថ្ងៃទី១៤ ខែកញ្ញា ជាមួយនឹងការដាក់លក់ជាសកលនៅថ្ងៃទី២៤ ខែកញ្ញា នេះបើយោងតាមអ្នកទម្លាយ ឈ្មោះ Jon Prosser។ ព្រឹត្តិការណ៍ទូរសព្ទ iPhone ប្រចាំខែកញ្ញាគឺនៅខាងមុខយើង ហើយការប្រមើលជុំវិញថ្ងៃប្រកាស ការបញ្ជាទិញទុកជាមុន និងថ្ងៃបញ្ចេញលក់ iPhone 13 កំពុងតែជ្រួលជ្រើម។

បន្ទាប់ពីមានរបាយការណ៍មួយបានបង្ហាញថា ថ្ងៃទី១៧ ខែកញ្ញា គឺជាថ្ងៃដាក់លក់ លោក Jon Prosser បានចេញមកស្រាយបំភ្លឺហើយ។ លោក Prosser បានបកស្រាយពីកាលបរិច្ឆេទថ្ងៃទី១៧ ខែកញ្ញា និងបន្ថែមព័ត៌មានលម្អិតបន្ថែម ដោយផ្ដល់ជូនពីប្រភពរបស់គាត់។

យោងតាមប្រភពរបស់គាត់បានឲ្យដឹងថា ការប្រកាសអញ្ជើញអ្នកសារព័ត៌មាននឹងធ្វើឡើងនៅថ្ងៃទី៧ ខែកញ្ញា ដើម្បីចូលរួមព្រឹត្តិការណ៍នៅថ្ងៃទី១៤។ ចំណែកថ្ងៃទី១៧ ខែកញ្ញា គឺជាពេលសម្រាប់ការបញ្ជាទិញទុកជាមុន មិនមែនថ្ងៃដាក់លក់ទេ ហើយនៅថ្ងៃទី២៤ ខែកញ្ញា គឺជាថ្ងៃបញ្ចេញលក់ពិតប្រាកដ។ លោក Prosser ក៏បានបញ្ជាក់ផងដែរថា ម៉ូឌែល iPhone 13 ទាំងអស់នឹងមានសម្រាប់ការបញ្ជាទិញទុកជាមុន ក្នុងពេលតែមួយ៕

ប្រភព: AppleInsider