កម្រជួប! ទើបរកឃើញអាចម៍ផ្កាយថ្មីមួយ ធ្វើដំណើរលឿនបំផុត ជុំវិញព្រះអាទិត្យ

បរទេស៖ អាចម៍ផ្កាយដែលទើបរកឃើញថ្មីមួយស្ថិតនៅកៀកព្រះអាទិត្យរបស់យើង ជាងផែនដីទៅទៀត។ អាចម៍ផ្កាយដែលមានឈ្មោះថា 2021 PH27 វាអាចបញ្ចប់គន្លងមួយជុំវិញព្រះអាទិត្យ ត្រឹមតែ១១៣ថ្ងៃ ហើយស្ថិតនៅក្នុងចម្ងាយ២០លានគីឡូម៉ែត្រពីផ្កាយរបស់យើង។ ​​នោះវាបានផ្ដល់ឲ្យថ្មអវកាសនេះ នូវគន្លងគោចរមួយដ៏ខ្លី ហើយវាក្លាយជាអង្គមានគន្លងគោចរខ្លីបំផុតទី២ បន្ទាប់ពីភពពុធ ដែលធ្វើដំណើរត្រឹមតែ៨៨ថ្ងៃជុំវិញព្រះអាទិត្យ។

អាចម៍ផ្កាយនេះមានទំហំ១គីឡូម៉ែត្រ ហើយមានអាចម៍ផ្កាយតិចតួចបំផុតដែលមានទំហំប៉ុណ្ណេះ ស្ថិតនៅប្រព័ន្ធព្រះអាទិត្យផ្នែកខាងក្នុង។ អាចម៍ផ្កាយ 2021 PH27 ស្ថិតនៅជិតព្រះអាទិត្យ ហើយមានសីតុណ្ហភាពនៅលើផ្ទៃរបស់វា ប្រមាណ៤៨២អង្សាសេ ដែលក្ដៅល្មមអាចរំលាយសំណ។

វាមានគន្លងមិនស្ថិតស្ថេរ ដែលឆ្លងកាត់គន្លងរបស់ភពពុធនិងសុក្រ ខណៈពេលពួកវាធ្វើដំណើរជុំវិញព្រះអាទិត្យ។ ក្នុងរយៈពេលពីរបីលានឆ្នាំ គន្លងគោចររបស់អាចម៍ផ្កាយនេះអាចនឹងបង្កហានិភ័យ។ បំណែកថ្មមួយនេះអាចនឹងបុកគ្នាជាមួយនឹងភពពុធឬសុក្រ ឬក៏ជាមួយព្រះអាទិត្យផ្ទាល់តែម្ដង ឬក៏ធ្វើដំណើរចាកចេញពីទីតាំងបច្ចុប្បន្ននៅក្នុងប្រព័ន្ធព្រះអាទិត្យ។ អាចម៍ផ្កាយនេះស្ថិតនៅជិតដែនទំនាញដ៏ខ្លាំងនៃព្រះអាទិត្យ ដែលអាចជះឥទ្ធិពលទៅលើគន្លងរបស់វា។ ខណៈពេលដែលមានអាចម៍ផ្កាយមួយចំនួនធ្វើដំណើរមកជិតព្រះអាទិត្យ ដូចអាចម៍ផ្កាយ 2021 PH27 នេះដែរ ពួកវាបែរជាមានគន្លងវែងជាង៕

ប្រភព: CNN