អង់គ្លេស៖ ក្លិបបិសាចក្រហម Manchester United ទើបតែបានប្រកាសជាផ្លូវការថាក្លិបបានព្រមព្រៀងលក្ខខណ្ឌក្នុងការទិញយកខ្សែការពារ Raphael Varane ពី Real Madrid ហើយដែលធ្វើឲ្យអ្នកគាំទ្រមានការសាទរជាខ្លាំងដោយសារ Varane ចាត់ទុកជាខ្សែការពារឆ្នើមមួយរូបនៅ La Liga ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស
ឮដូច្នេះ លោក Ray Parlour ដែលជាអតីតកីឡាកររបស់ Arsenal បាននិយាយថា Varane នឹងដើរតាមជំហានរបស់ ខ្សែការពារ Ruben Dias នៃក្លិប Manchester City។
Dias ផ្ទេរពីក្លិប Benfica មកកាន់ទឹកដី Etihad កាលពីឆ្នាំមុនតែគេបានជួយឲ្យក្រុមលើកពាន Premier League និងបានឈ្នះពានរង្វាន់ផ្ទាល់ខ្លួនជាច្រើនទាំងដែលទើបតែផ្លាស់មកលេងនៅ Premier League បានមួយរដូវកាលនោះគឺពានរង្វាន់ កីឡាករល្អបំផុតប្រចាំក្លិប,កីឡាករឆ្នើមបំផុតប្រចាំ Premier League នៅរដូវកាល ២០២០/២០២១ និងពាន អ្នកលេងបាល់ទាត់ដ៏ល្អបំផុតពី សមាគមន៍អ្នកសរសេរពីបាល់ទាត់ផងដែរ។
ដូច្នេះទើបលោក Parlour បានបញ្ចេញយោបល់ថា Raphael Varane នឹងក្លាយជា Dias ទី២ដែលកែប្រែឲ្យក្រុមលេងកាន់តែល្អជាងមុន។
លោកបានថ្លែងប្រាប់ talkSPORT ថា៖
Man City លេងការពារបានល្អខ្លាំងណាស់កាលពីឆ្នាំមុន នេះជាចំណុចដែលល្អគួរឲ្យកត់សម្គាល់។ Ruben Dias បានផ្ទេរមក ហើយអ្នកមិនអាចស្រមៃបានទេកីឡាកររូបនេះនឹងលេងបានល្អឬអត់តែការពិតជាក់ស្ដែងគឺគេសម្របខ្លួនបានល្អខ្លាំងណាស់នៅក្របខណ្ឌ Premier League ហើយ John Stones ក៏លេងល្អឡើងៗដោយសារតែ Dias ដែរ។ ដូច្នេះ Varane អាចនឹងជះឥទ្ធិពលដូច Ruben Dias ក្លិបទាំងមូលនឹងលេងការពារបានកាន់តែល្អជាងមុន។ បើសិនឲ្យ Harry Maguire លេងជាមួយ Varane នោះពួកគេអាចនឹងចាប់ដៃគូគ្នាលេងត្រូវជើងណាស់។ វានឹងធ្វើឲ្យ Manchester United ក្លាយជាក្លិបខ្លាំងជាងមុនប្រាកដណាស់៕
ប្រភព៖ mirror
Bong I.T