ក្រៅពី Varane ក្លិប Man UTD ចង់សុំខ្ចីជើងកីឡាកររូបនេះពី R.Madrid ម្នាក់ទៀត

អេស្ប៉ាញ៖ បន្ទាប់ពីមានការចរចាលើការលក់ខ្សែការពារ Raphael Varane ទៅឲ្យក្លិប Manchester United រួចមក ឥលូវនេះក្លិបអធិរាជស Real Madrid ទំនងជាចង់លក់ខ្សែប្រយុទ្ធ Vinicius Junior ទៅឲ្យ ភាគីរបស់លោកគ្រូបង្វឹក Ole Gunnar Solskjaer ទៀតផង។

Man UTD បានទិញយក Jadon Sancho ពី Borussia Dortmund ដោយជោគជ័យទើបក្លិបបង្វែរមុខសញ្ញាទៅទិញ Varane ពី Real Madrid ម្ដងខណៈដែលការចរចាគឺរលូនល្អដោយក្លិបរំពឹងទុកថា Real Madrid នឹងព្រមលក់ កីឡាករសញ្ជាតិបារាំងរូបនេះមកឲ្យដោយភ្នាក់ងាររបស់ Varane ថែមទាំងបានព្រមព្រៀងកុងត្រា៥ឆ្នាំទៀតផង។

យោងតាមសារព័ត៌មាន The Mirror គឺ Real Madrid ក៏ចង់លក់ Vinicius Jr. ដែរនិងបានដាក់តម្លៃខ្លួនកីឡាករសញ្ជាតិប្រេស៊ីលរូបនេះចំនួន ៦៨.៥លានផោន(ស្មើនឹងប្រមាណ ៩៤.២លានដុល្លារ) ប៉ុន្តែ Man UTD ចង់ទិញយកគេក្នុងតម្លៃទាបជាងនេះហើយពេលនេះក្លិបទាំងពីរកំពុងពិភាក្សាលើការខ្ចីជើង Vinicius ដោយមានលក្ខខណ្ឌអាចទិញផ្ដាច់បាន។

គួរបញ្ជាក់ផងដែរថា Real Madrid កំពុងចង់លក់កីឡាករក្នុងស្ដុកចេញខ្លះដើម្បីអាចយកប្រាក់មកទិញខ្សែប្រយុទ្ធ Kylian Mbappe ពី PSG៕

ប្រភព៖ metro