អង់គ្លេស៖ ក្រោយបិសាចក្រហម Manchester United ត្រូវប៉ះក្រុមខ្លាំង Roma នៅវគ្គពាក់កណ្ដាលផ្ដាច់ព្រ័ត្រពាន Europa League លោកគ្រូបង្វឹក Ole Gunnar Solskjaer បានបង្ហើបឲ្យដឹងថា ខ្សែប្រយុទ្ធ Edin Dzeko គឺជាឧបសគ្គរារាំងដ៏ធំបំផុតរបស់ក្រុម។
Manchester United ទើបតែប្រកួតយកឈ្នះ Granada ៤ទល់នឹង ០ សរុបទាំងពីរជើងធ្វើឲ្យបានឡើងទៅកាន់វគ្គពាក់កណ្ដាលផ្ដាច់ព្រ័ត្រ ទន្ទឹមគ្នានឹងក្រុមបីផ្សេងទៀតគឺ Roma, Arsenal និង Villarreal ផងដែរ។
ដូច្នេះហើយទើបលោកគ្រូបង្វឹក Ole Gunnar Solskjaer គិតថា Roma មិនមែនជាក្រុមដែលអាចមើលងាយបានឡើយក្រោយក្រុមនៅអ៊ីតាលីមួយនេះបានទម្លាក់ Ajax ពីពាន Europa League ដោយលោកគ្រូបានថ្លែងប្រាប់ BT Sport ថា៖
ការពិតទៅខ្ញុំមិនសូវបានមើលការប្រកួតរបស់ពួកគេឡើយ។ ខ្ញុំដឹងថាក្រុមនេះត្រូវលេងពីរជើងទល់នឹងAjax ហើយបើតាមខ្ញុំសង្កេតឃើញគឺពួកគេលេងការពារបានល្អ ដូចដែលក្រុមនៅអ៊ីតាលីផ្សេងទៀតដែរ។ ពួកគេជាក្រុមមួយដែលមានបទពិសោធន៍ ហើយពួកយើងទាំងអស់គ្នាសុទ្ធតែស្គាល់ Dzeko ព្រោះគេជាកីឡាករដ៏គ្រោះថ្នាក់ពេលឈរនៅមុខប្រអប់ទីពួកយើង។ ពួកយើងនឹងរង់ចាំជួបពួកគេ ឥលូវនេះពួកយើងឈានមកដល់វគ្គពាក់កណ្ដាលផ្ដាច់ព្រ័ត្រហើយ។ Roma គឺជាក្លិបដែលមានប្រវត្តិដ៏ចំណាស់ ប៉ុន្តែពួកយើងភាគច្រើនអាចយកឈ្នះក្រុមនៅអ៊ីតាលីបាន។
ប្រភព៖ metro
Bong I.T