បណ្ដាប្រទេសមហាអំណាចសេដ្ឋកិច្ចពិភពលោកទាំង៧ ស្នើឱ្យរុស្ស៊ីបញ្ឈប់សកម្មភាពបង្កហេតុតាមព្រំដែនអ៊ុយក្រែន

បន្ទាប់ពីរុស្ស៊ីបានប្រមូលផ្តុំកងទ័ពនៅតាមបណ្តោយព្រំប្រទល់ជាមួយអ៊ុយក្រែនមក បណ្ដាប្រទេសមហាអំណាចសេដ្ឋកិច្ចពិភពលោកទាំង៧ (G7) ក៏អំពាវនាវឱ្យរុស្ស៉ីបញ្ឈប់សកម្មភាពបង្កហេតុរបស់ខ្លួន និងងាកមករកការបន្ធូរបន្ថយភាពតានតឹងវិញ។

នៅមុនកិច្ចប្រជុំរបស់អង្គការ NATO ពាក់ព័ន្ធនឹងការព្រួយបារម្ភ រដ្ឋមន្រ្តីការបរទេសក្រុមប្រទេស G7 បានថ្លែងថា ជម្លោះប្រដាប់អាវុធដែលបានកើតឡើង និងកំពុងអូសបន្លាយរាប់ឆ្នាំនៅតំបន់ភាគខាងកើតអ៊ុយក្រែននោះ អាចនឹងត្រូវបានផ្ទុះឡើងខ្លាំងក្នុងឆ្នាំនេះ។

អ៊ុយក្រែនបានបញ្ជាក់ថា ប្រទេសរុស្ស៉ីបានប្រមូលផ្តុំកងទ័ពរាប់ពាន់នាក់នៅតាមបណ្តោយព្រំដែនភាគខាងជើង និងខាងកើតរបស់ខ្លួន ព្រមទាំងនៅតំបន់គ្រីមៀផងដែរ ។ ទន្ទឹមនឹងនេះ រុស្ស៊ីមិនបានបដិសេធចំពោះការចល័តទ័ពនេះឡើយ ដោយបានអះអាងថា វាធ្វើដើម្បីពង្រឹងការការពារខ្លួន ដោយពុំមានបំណងទៅគំរាមកំហែងប្រទេសណាមួយនោះទេ៕