ក្រុមហ៊ុន Neuralink របស់មហាសេដ្ឋី Elon Musk ដាក់ឈីបក្នុងខួរក្បាលស្វា ដើម្បីឱ្យវាលេងហ្គេមវាយពីងប៉ុង (មានវីដេអូ)

បរទេស៖ ក្រុមហ៊ុន Neuralink របស់លោក Elon Musk ដែលជាក្រុមហ៊ុនមួយផ្តោតលើការស្រាវជ្រាវផ្នែក mind control បានបញ្ចេញវីដេអូថ្មីមួយបង្ហាញពីសត្វស្វាលេងហ្គេមវាយពីងប៉ុង ដោយប្រើតែខួរក្បាលរបស់វាបញ្ជា។

នៅក្នុងវីដេអូខាងក្រោម Neuralink បង្ហាញពីការចាប់សកម្មភាព baseline data របស់ខួរក្បាលស្វាមួយក្បាលឈ្មោះ Pager ដែលប្រើឈីបក្នុងខួរក្បាលរបស់វាលេងហ្គេមលើអេក្រង់ ហើយវាបានប្រើដៃរបស់វាកាន់ joystick ដើម្បីរំកិលវត្ថុដែលនៅក្នុងហ្គេម។

ដោយប្រើ baseline data នេះ ក្រុមហ៊ុន Neuralink អាចសិក្សាលើសកម្មភាពដែលស្វា Pager បង្វិល joystick ហើយនៅទីបំផុតគេអាចព្យាករណ៍ថាវានឹងធ្វើអ្វីបន្ទាប់ទៀតបានយ៉ាងត្រឹមត្រូវ មុនពេលដែលស្វានេះបង្វិល joystick ទៅទៀត។

បន្ទាប់មកក្រុមអ្នកស្រាវជ្រាវបានដក​ joystick នោះចេញទាំងស្រុង ហើយនៅទីបំផុតស្វា Pager លែងត្រូវការដៃរបស់វាដើម្បីរំកិលវត្ថុក្នុងហ្គេម ហើយវាបានគ្រប់គ្រងសកម្មភាពនៅក្នុងហ្គេមទាំងស្រុងដោយប្រើតែខួរក្បាលវាប៉ុណ្ណោះ។ 

វីដេអូថ្មីនេះ បញ្ជាក់កាន់តែច្បាស់ពីទិសដៅរបស់បច្ចេកវិទ្យា ដែលនឹងឈានទៅរកការដាក់ឈីបក្នុងខួរក្បាលរបស់មនុស្ស។ ក្រុមហ៊ុនបានចែករំលែកនៅលើប្លក់របស់ខ្លួនថា បច្ចេកវិទ្យានេះអាចត្រូវបានប្រើ ដើម្បីជួយដល់អ្នកជំងឺដែលខ្វិនមិនអាចកម្រើកបាន ក្នុងការប្រើប្រាស់ឧបករណ៍នានា ដូចជាបញ្ជា cursor លើកុំព្យទ័រ គ្រប់គ្រង iPhone ឬវាយក្តារចុច virtual keyboard ផងដែរ៕