បន្ទុះភ្នំភ្លើងនៅ​ឥណ្ឌូណេស៊ី បង្ហាញឱ្យឃើញ រំហូរកម្អែលភ្នំភ្លើងឡើងក្រហមឆ្អៅ

ឥណ្ឌូណេស៊ី៖ នៅថ្ងៃពុធនេះ បន្ទុះភ្នំភ្លើងសកម្មបំផុតមួយនៅប្រទេសឥណ្ឌូណេស៊ី បានបង្កឱ្យមានរំហូរកម្អែលភ្នំភ្លើងឡើងក្រហមឆ្អៅមានប្រវែង ១,៥០០ម៉ែត្រ ហូរតាមជម្រាលភ្នំភ្លើង និងមានផ្សែងអណ្តែតពេញអាកាសផងដែរ។

ក្នុងនោះ អាជ្ញាធរបានប្រាប់ឱ្យដឹងថា រំហូរកម្អែលភ្នំភ្លើងខាងលើ គឺជារំហូរកម្អែលភ្នំភ្លើងដ៏ធំជាងគេបង្អស់របស់ភ្នំភ្លើង Merapi ដោយចាប់តាំងពីវាបង្កើនកម្រិតគ្រោះថ្នាក់ខ្លាំងឡើងកាលពីខែវិច្ឆិកា ឆ្នាំ ២០២០កន្លងមក។ យ៉ាងណាមិញ អាជ្ញាធរបាន អំពាវនាវឱ្យពលរដ្ឋត្រូវនៅឱ្យឆ្ងាយពីតំបន់គ្រោះថ្នាក់ ដែលមានចម្ងាយ ៥ គីឡូម៉ែត្រពីរណ្ដៅមាត់ភ្នំភ្លើងតាមជម្រាលភ្នំ ព្រោះវាអាចបង្កឱ្យមានកម្អែលភ្នំភ្លើងហៀរចេញមកក៏ថាបាន និងរងចាំស្តាប់សញ្ញាប្រកាសអាសន្ន ខណៈក្រុមអាជ្ញាធរក្នុងតំបន់កំពុងតាមដានស្ថានភាពសិន។

គួរជម្រាបដែរថា ភ្នំភ្លើង Merapi​ ដែលមានកម្ពស់ជិត ៣,០០០ ម៉ែត្រ មានទីតាំងស្ថិតនៅក្នុងកោះ Java ដែលសម្បូរទៅដោយមនុស្សរស់នៅ និងជិតទីក្រុងបុរាណ Yogyakarta។ ភ្នំភ្លើងនេះគឺជាភ្នំភ្លើងសកម្មបំផុតនៅក្នុងប្រទេសឥណ្ឌូណេស៊ី ហើយក្នុងឆ្នាំ ២០១០កន្លងមក បន្ទុះភ្នំភ្លើងបានឆក់យកជីវិតមនុស្សអស់ ៣៤៧នាក់៕