ទីភ្នាក់ងារស៊ើបការណ៍សំងាត់អាហ្វកានីស្ថាន បានបំផ្លាញផែនការរបស់ក្រុម ISIS ក្នុងការធ្វើឃាត អ្នកការទូតអាមេរិកមួយរូប

កាប៊ុល៖ ទីភ្នាក់ងារស៊ើបការណ៍សំងាត់អាហ្វកានីស្ថានបានប្រាប់ឱ្យដឹងថា ពួកគេបានបំផ្លាញការប៉ុនប៉ងរបស់សមាជិកក្រុម ISIS ចំនួន ៤នាក់ក្នុងការធ្វើឃាតអ្នកការទូតអាមេរិកម្នាក់នៅក្នុងទីក្រុងកាប៊ុល។

អ្នកការទូតអាមេរិកលោក  Ross Wilson ជាអ្នកប្រចាំការនៅទីក្រុងកាប៊ុលគឺជាគោលដៅនៃការវាយប្រហាររបស់ក្រុម ISIS ដែលពួកគេបានគ្រោងទុកនៅថ្ងៃច័ន្ទកន្លងទៅ ប៉ុន្តែត្រូវបានក្រុមស៊ើបការណ៍សំងាត់អាហ្វកានីស្ថានបំផ្លាញផែនការទាន់ពេល។ ក្នុងនោះ អ្នកនាំពាក្យក្រសួងការបរទេសអាហ្វកានីស្ថានបានបន្ថែមថា សុវត្ថិភាពរបស់បុគ្គលិកអាមេរិកនៅក្នុងប្រទេសអាហ្វកានីស្ថានគឺជាកាតិព្វកិច្ច​ចម្បងរបស់ប្រទេសខ្លួន។

គួរជម្រាបដែរថា យោងតាមសេចក្តីថ្លែងរបស់ប្រទេសអាហ្វកានីស្ថាន គឺមិនបានបង្ហាញព័ត៌មានលម្អិតទាក់ទងនឹងដំណើរការនៃការវាយប្រហាររបស់សមាជិកក្រុម ISIS  ខាងលើនោះទេ។  ហើយបច្ចុប្បន្ននេះ សមាជិកក្រុម ISIS ទាំង ៤នាក់ខាងលើ ត្រូវបានចាប់ខ្លួននៅក្នុងប្រតិបត្តិការយោធាពិសេស NDS  រួមទាំងមេខ្លោងម្នាក់ផងដែរ៕