ប្រយ័ត្ន​​!​ មេរោគ​កុំព្យូទ័រ​មួយ​ប្រភេទ ត្រូវពួក Hacker បង្កើត​ដើម្បី Lock ទិន្នន័យ​របស់អ្នក រួចជំរិត​ទារ​ប្រាក់​ជា​ថ្នូរ​នឹង​ការ​ដោះ​សោរ​វិញ​​

សូមប្រុងប្រយ័ត្នជាមួយមេរោគកុំព្យូទ័រថ្មីដែលមានឈ្មោះថា “OMFL Ransomware”។

តើ “OMFL Ransomware” គឺជាអ្វី?

វាជាមេរោគកុំព្យូទ័រមួយប្រភេទ ដែលពួក Hacker បង្កើតឡើងដើម្បីចាក់សោរទិន្នន័យ​របស់លោកអ្នក បន្ទាប់មក​ទាមទារ​​ប្រាក់មួយចំនួនពី ៤០០ ទៅ​ ៩០០$សម្រាប់ដោះសោឯកសារនោះបានវិញ។

omfl ransomware អាចឆ្លងពីការបើកអ៊ីម៉ែលអាណាមិក ទាញយកកម្មវិធី crack ឬប្រើ torrent ទាញយក​ភាពយន្ដផ្សេងៗ។ បន្ទាប់មកវាក៏អាចជ្រៀតចូលប្រព័ន្ធកុំព្យូទ័ររបស់អ្នកនិងផ្លាស់ប្តូរឈ្មោះឯកសារ រូបថត វីដេអូ ជាដើមរបស់​អ្នកដោយបន្ថែម ".omfl" នៅកន្ទុយ ហើយបើកលែងកើត។

ចុងក្រោយបន្ទាប់ពីការជ្រៀតចូលដោយជោគជ័យ file “readme.txt” នឹងបង្ហាញហើយប្រាប់អ្នកថា ប្រសិនបើអ្នក​ចង់​យកឯកសាររបស់អ្នកត្រឡប់មកវិញ អ្នកត្រូវទាក់ទងអ៊ីមែលមួយនិងទូទាត់ប្រាក់មួយចំនួនធំ។

បច្ចុប្បន្ននេះ អាចមានវិធីដើម្បីដោះសោរឯកសារដោយឥតគិតថ្លៃជាច្រើននៅលើអ៊ីនធឺណិត ប៉ុន្តែមិនបានធានាថា​វានឹង​ដំណើរការ ១០០% នោះទេ។ ដូច្នេះត្រូវយកចិត្តទុកដាក់ដើម្បីជៀសវាងការបាត់បង់ជាយថាហេតុ៕