គ្រាប់ទី៣ស៊ុតពីពាក់កណ្ដាលតារាងទៅហ្មង! Spurs ចាក់ Ludogorets ៤ខ្នាយ ក្នុងការប្រកួតពាន UEL យប់មិញនេះ (មានវីដេអូ)

អង់គ្លេស៖ ក្រុមមាន់ខ្នាយមាស Tottenham Hotspur មានសង្ឃឹមកាន់តែខ្ពស់ក្នុងការឆ្លងទៅវគ្គ៣២ក្រុមចុងក្រោយ ពានរង្វាន់ ​Europa League ក្រោយយកឈ្នះក្រុមជើងខ្លាំងមកពីប៊ុលការី Ludogorets Razgrad កាលពីរាត្រីថ្ងៃព្រហស្បតិ៍ម្សិលមិញ នៅក្នុងទឹកដីរបស់ខ្លួន ដោយលទ្ធផលគាប់ប្រសើរ ៤ទល់នឹង០។

ក្នុងការប្រកួតនេះ គិតត្រឹមតង់ទី១ មានគ្រាប់បាល់កើតឡើងចំនួន២គ្រាប់ ធ្វើបានដោយខ្សែប្រយុទ្ធចំណូលថ្មី ដែលទើបខ្ចីជើងពីក្លិប Benfica កាលដើមខែតុលាកន្លងទៅ កីឡាករ Carlos Vinicius នៅនាទីទី១៦ និង ៣៤។

ការប្រកួតអូសបន្លាយដល់នាទីទី៦៣ ទើប Spurs មានឱកាសបន្ថែមគ្រាប់ទី៣ ដែលជាការស៊ុតពីលើពាក់កណ្ដាលតារាងបន្តិច ចម្ងាយខ្ទង់៤៥ម៉ែត្រ បញ្ចូលទីយ៉ាងអស្ចារ្យពីសំណាក់កីឡាករ Harry Winks ខណៈគ្រាប់ទី៤សម្រេចទីដោយខ្សែប្រយុទ្ធសញ្ជាតិប្រេស៊ីល កីឡាករ Lucas Moura នៅនាទីទី៦៣។

តាមរយៈលទ្ធផល ៤-០ នេះ បានជួយ Spurs បន្តឈរលេខ២ ក្នុងពូល J មាន៩ពិន្ទុស្មើគ្នាជាមួយក្រុមកំពូលតារាង Royal Antwerp ដែលទើបយកឈ្នះក្រុមលេខ៣ LASK ២-០ កាលពីយប់មិញដែរនោះ​ ខណៈក្រុម Ludogorets នៅបាតតារាងដដែល មាន០ពិន្ទុ។

គួររម្លឹកដែរថា ជ័យជម្នះកាលពីយប់មិញ ជាការឈ្នះ៥ប្រកួតជាប់គ្នា របស់ Spurs គិតគ្រប់កម្មវិធីទាំងអស់ ជាលើកដំបូងហើយ រាប់តាំងពី ខែវិច្ឆិកា ឆ្នាំ២០១៨មក ក្នុងរជ្ជកាលលោក Mauricio Pochettino ដឹកនាំដែលកាលនោះគ្រូបង្វឹកសញ្ជាតិអាហ្សង់ទីន ដឹកនាំក្រុមដែលមានមូលដ្ឋាននៅភាគខាងជើងទីក្រុងឡុងដ៍មួយនេះ​ឈ្នះ៦ប្រកួតជាប់គ្នា៕

បើចង់ឃើញការស៊ុតរបស់ Wink ល្អយ៉ាងណានោះ សូមទស្សនាវីដេអូខាងក្រោម៖