តូក្យូត្រៀមបង្កើនកម្រិតប្រកាសអាសន្ន ខណៈករណីឆ្លងជំងឺកូវីដ-១៩ ស្ទុះឡើង​ខ្លាំង

តូក្យូ៖ ទីក្រុងតូក្យូប្រទេសជប៉ុន បានត្រៀមប្រកាសកម្រិត​អាសន្នខ្ពស់បំផុតនៅថ្ងៃព្រហស្បតិ៍នេះ ខណៈករណីឆ្លងថ្មីបានបន្តកើនឡើងលើសពី ៥០០ករណី ហើយអភិបាល​ក្រុង​ព្រមានថា ករណីឆ្លងនឹងកើនឡើងកាន់តែច្រើន ប្រសិនបើមិនមានវិធានការការពារឱ្យទាន់ពេលវេលាទេនោះ។

អភិបាលក្រុងតូក្យូ លោកស្រី Yuriko Koike បានប្រាប់ទៅកាន់ក្រុមអ្នកសារព័ត៌មានកាលពីល្ងាចថ្ងៃពុធថា រដ្ឋាភិបាល​នឹងចាត់វិធានការ ដើម្បីប្រយុទ្ធប្រឆាំងនឹង​ជំងឺរាតត្បាតកូវីដ-១៩នេះ ដោយការ​សម្លឹងឃើញថា ករណីឆ្លងថ្មីៗអាចនឹងកើនឡើងដល់ ១,០០០ករណី ក្នុងមួយថ្ងៃ។

អ្នកនាំពាក្យរដ្ឋាភិបាល លោក Katsunobu Kato ក៏បានឱ្យដឹងដែរថា រដ្ឋាភិបាល​មិនទាន់ប្រកាសស្ថានភាពអាសន្នភ្លាមៗទេ ប៉ុន្តែនឹងបន្តតាមដានអត្រាឆ្លងជាក់ស្តែង ក៏ដូចជាមើលទៅ​លើ​​លទ្ធភាពមន្ទីរពេទ្យ ក្នុង​ការព្យាបាលអ្នកជំងឺ។

គួរជម្រាបថា កាលពីថ្ងៃពុធម្សិលមិញនេះ ទូទាំងប្រទេសជប៉ុន​មានករណីឆ្លងថ្មីជាង ២,០០០ករណី ដោយក្នុងទីក្រុងតូក្យូមានជិត ៥០០ករណី។ ហើយ​គិតមកត្រឹមថ្ងៃនេះ ជប៉ុនមានករណីឆ្លងជំងឺកូវីដ-១៩សរុប ១២០,៨១៥ករណី ជាមួយករណីស្លាប់ ១,៩១៣ករណី៕