ឡូយហួស! គ្រាន់តែថតរូបផ្សេងៗ ជាមួយកម្មវិធីមួយនេះ វាអាចកាត់រូបភាព ដាក់លើកុំព្យូទ័របានភ្លាម

បរទេស៖ កម្មវិធី ClipDrop គឺជាកម្មវិធីថ្មីមួយ ដែលនឹងអនុញ្ញាតឲ្យទូរសព្ទរបស់អ្នកថតយករបស់របរនៅជុំវិញ ហើយបញ្ជូនវាដាក់នៅលើកម្មវិធីផ្សេងៗ លើកុំព្យូទ័រ ហើយឥឡូវនេះវាត្រូវបានគេបញ្ចេញឲ្យប្រើសាកល្បង។

វាប្រៀបបាននឹងបច្ចេកវិទ្យា AR ដែលអាចទាញរូបពីពិភពពិតខាងក្រៅ​ ធ្វើជារូបឌីជីថល ជាជាងយករូបឌីជីថលមកដាក់នៅលើ ពិភពពិតខាងក្រៅ ដែលយើងធ្លាប់ឃើញកន្លងមក។ កម្មវិធីមួយនេះអនុញ្ញាតឲ្យយើង ថតយករូបភាពនានានិងថែមទាំងអក្សរពីក្នុងសៀវភៅ ដាក់ចូលកម្មវិធីជាច្រើននិងគេហទំព័រ រួមមានកម្មវិធី Photoshop, Google Docs, PowerPoint, Figma, Canva, និង Pitch។

ជាការពិតណាស់ វាអាចទាញយករូបភាពពីជីវភាពប្រចាំថ្ងៃរបស់យើង មកដាក់ជារូបឌីជីថលវិញ តាមរយៈប្រព័ន្ធប្រតិបតិ្តការ iOS និង Android។ បន្ថែមពីនេះ វាក៏អាចដំណើរការនៅលើប្រព័ន្ធប្រតិបត្តិការ Windows និង macOS ផងដែរ ដែលអាចទាញយករូបភាពនានានិងអក្សរពីកុំព្យូរទ័រឬពីគេហទំព័រ ហើយអាចបញ្ចូលពួកវាធ្វើជាឯកសារផ្សេងៗ។

បើទោះបីជាកម្មវិធី ClipDrop បានដាក់ឲ្យប្រើជាសាធារណៈ អ្នកអភិវឌ្ឍន៍កម្មវិធីបានលើកឡើងថា វានៅស្ថិតនៅក្នុងជំនាន់ beta ដែលអ្នកប្រើប្រាស់អាចជួបប្រទះនូវបញ្ហា ដូចជា bug និងការឈូសកែមនៃរូបភាព។ យ៉ាងណាមិញ កម្មវិធីមួយនេះតម្រូវឲ្យអ្នកប្រើប្រាស់ចំណាយថវិកាផ្ទាល់ខ្លួន ដើម្បីប្រើប្រាស់ផងដែរ៕