ក្រុមស៊ើបអង្កេតសហព័ន្ធសហរដ្ឋអាមេរិក (FBI) នឹងបង្កើតការិយាល័យនៅទីស្នាក់ការអគ្គស្នងការដ្ឋាននគរបាលជាតិរបស់កម្ពុជា ដើម្បីជួយតាមរកឧក្រិដ្ឋជនអាមេរិក ស្របពេលទីក្រុងវ៉ាស៊ីនតោនកំពុងព្យាយាមស្តារស្ថានការដែលមានភាពតានតឹងជាមួយប្រទេសជាសម្ព័ន្ធមិត្តជិតស្និទ្ធរបស់ចិនផង។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សលោកឧត្តមសេនីយ៍ឯក ឆាយ គឹមឃឿន អ្នកនាំពាក្យនៃអគ្គស្នងការដ្ឋាននគរបាលជាតិ បានអះអាងនៅថ្ងៃអង្គារនេះថា ការិយាល័យនេះនឹងជួយសម្រួលដល់ការងាររបស់អាជ្ញាធរកម្ពុជា ដើម្បីតាមចាប់ខ្លួនជនជាតិអាមេរិកដែលរត់គេចខ្លួន និងដើម្បីប្រយុទ្ធប្រឆាំងនឹងអំពើភេរវកម្មនានា។
លោក ឆាយ គឹមឃឿន បានប្រាប់សារព័ត៌មានរ៉យទ័រថា៖ «ពីមុនយើងបានសហការគ្នាម្តងមួយករណីៗ ហើយពេលនេះយើងមានការិយាល័យដែលអាចធ្វើការជាមួយគ្នា មានគោលដៅធ្វើការបានលឿនទាន់ស្ថានការ»។
យ៉ាងណា អ្នកនាំពាក្យនៃអគ្គស្នងការដ្ឋាននគរបាលជាតិរូបនេះបន្តថា លោកមិនបានដឹងអំពីកាលបរិច្ឆេទដែលការិយាល័យនេះនឹងត្រូវបង្កើតឡើងនៅឡើយទេ។
តាមរយៈសារអេឡិចត្រូនិកអ៊ីមែលទៅកាន់រ៉យទ័រ ស្ថានទូតអាមេរិកប្រចាំកម្ពុជាបានបដិសេធមិនធ្វើអត្ថាធិប្បាយលើការិយាល័យរបស់ FBI ខាងលើនោះទេ ប៉ុន្តែបាននិយាយថា ស្ថាប័នទាំងពីរមានទំនាក់ទំនងដែលបានបង្កើតឡើងមែន។
ស្ថានទូតបញ្ជាក់ថា៖ «ការចូលរួមរវាង FBI ជាមួយសមត្ថកិច្ចកម្ពុជា គឺត្រូវបានបង្កើតឡើងដើម្បីប្រឆាំងនឹងឧក្រិដ្ឋកម្មលើកុមារ ការលាងលុយកខ្វក់ និងបទឧក្រិដ្ឋហិរញ្ញវត្ថុ។ កិច្ចសហប្រតិបត្តិការនេះជួយពង្រឹងច្បាប់ ធ្វើឱ្យកម្ពុជា និងអាមេរិកមានសុវត្ថិភាព»។
ស្ថានទូតបានបន្ថែមថា កិច្ចព្រមព្រៀងមួយត្រូវបានធ្វើឡើងកាលពីឆ្នាំមុន ដើម្បីបង្កើតក្រុមការងារដែលនឹងដោះស្រាយនូវឧក្រិដ្ឋកម្ម ដែលបានរៀបចំការលាងលុយកខ្វក់ និងស្វែងរកជនបរទេសរត់គេចខ្លួនផងដែរ។
បើតាមរ៉យទ័រ ចំណងទាក់ទងរវាងអាមេរិក និងកម្ពុជាហាក់មានសភាពតានតឹងនៅប៉ុន្មានឆ្នាំចុងក្រោយនេះ ដោយរដ្ឋាភិបាលកម្ពុជាខឹងនឹងការរិះគន់របស់ក្រុងវ៉ាស៊ីនតោនចំពោះការរំលាយគណបក្សប្រឆាំងដ៏ធំ និងការចាប់ខ្លួនអ្នកនយោបាយ និងសកម្មជនដែលជាគូប្រជែង។
ជាការកត់សម្គាល់ កម្ពុជាបានបដិសេធម្តងហើយម្តងទៀតនូវការលើកឡើងថា កម្ពុជាមានកិច្ចព្រមព្រៀងសម្ងាត់ជាមួយចិន (ដាក់កម្លាំងទ័ពនៅមូលដ្ឋាន) ខណៈចិនជាសម្ព័ន្ធមិត្តសេដ្ឋកិច្ច និងការទូតដ៏ធំបំផុតរបស់កម្ពុជា៕
![រូបភាពតំណាងពីសារព័ត៌មានរ៉យទ័រ](https://s9.kh1.co/__image/w=650,h=436,q=100/d2/d2fabd6d8a79d2aa20bf632bb6024d49ab122bc3.png)