ម៉ូស្គូ៖ អាជ្ញាធររុស្ស៊ីបានជម្លៀស​ប្រជាជន​ប្រមាណ ២,៣០០នាក់ ចេញពីភូមិនានាក្នុងតំបន់ Ryazan កាលពីថ្ងៃពុធ ដោយក្នុងនោះមានទាំងមនុស្ស ៥នាក់ ត្រូវបានបញ្ជូនទៅកាន់មន្ទីរពេទ្យ បន្ទាប់ពី​អគ្គិភ័យ​បានឆាបឆេះនៅឃ្លាំងផ្ទុកអាវុធយុទ្ធភណ្ឌ ដែល​បង្កជាផ្សែង​ខ្មៅអួរអាប់ពេញផ្ទៃមេឃ។

យោងតាមសេវា​សង្គ្រោះបន្ទាន់រុស្ស៊ី​ បានប្រាប់ទីភ្នាក់ងារសារព័ត៌មាន RIA ថា នៅក្នុងឃ្លាំងអាវុធមានផ្ទុកមីស៊ីល និងគ្រាប់កាំភ្លើងធំ​ចំនួន ១១០គ្រាប់ ហើយគេអាចឮសំឡេងផ្ទុះនៅរៀងរាល់ ៥ទៅ១០ វិនាទីម្តង។ ចំណែក​សារព័ត៌មាន TASS ​ក៏បានឱ្យដឹងដែរថា ក្នុងហេតុការណ៍នេះមានមនុស្ស ៦នាក់បានរងរបួស ​ដោយ ៥នាក់ ត្រូវបានបញ្ជូនទៅកាន់មន្ទីរពេទ្យ។

គួរជម្រាបដែរថា ផ្លូវធ្វើដំណើរនានានៅ​ក្នុងតំបន់កើតហេតុត្រូវបានបិទ ហើយប្រជាជន​យ៉ាងតិចចំនួន ១៤ភូមិ​ ត្រូវបានជម្លៀស​ទៅរកទីកន្លែងសុវត្ថិភាព។ ចំណែកអភិបាលខេត្ត ក៏បានប្រកាសស្ថានភាពអាសន្ន នៅក្នុងតំបន់ផងដែរ៕

សូមទស្សនាវីដេអូខាងក្រោម៖