កំពុងបរិភោគអាហារលើកោះសុខៗ ស្រាប់តែក្ដាមធំៗលើកទ័ពចេញមករំខាន ព្រោះតែធុំក្លិនអាហារ

អូស្ត្រាលី៖ ថ្មីៗនេះ គ្រួសាររបស់អ្នកស្រី Amy Luetich បានទៅបោះតង់នៅលើកោះមួយឈ្មោះថា Christmas Island ដែលមានទីតាំងស្ថិតនៅឆ្ងាយពីភាគពាយ័ព្យនៃប្រទេសអូស្ដ្រាលី។ ហើយនៅពេលដែលពួកគេកំពុងអាំងសាច់ សម្រាប់ទទួលទានពេលរាត្រី ក៏ស្រាប់តែមានហ្វូងក្ដាមធំៗចេញពីក្នុងទឹក និងវារមកលើគោកតែម្ដង។

ហ្វូងក្ដាមទាំងនោះ មានរូបរាងយ៉ាងកាច និងត្រូវបានគេស្គាល់ថាជា ក្ដាមដូង ហើយពួកវា ពូកែខាងហិតក្លិនផងដែរ។ ពួកវា បានវារឡើងមកលើគោកដើម្បីស្វែងរកចំណីសុី ព្រោះតែធុំក្លិនអាហារ ដែលក្រុមគ្រួសាររបស់អ្នកស្រី Amy បានអាំងសាច់។

អ្នកស្រី Amy បានឲ្យដឹងថា អ្នកស្រី ព្រមទាំងគ្រួសារបានរស់នៅលើកោះនេះ ជាច្រើនឆ្នាំហើយ ហើយក៏ធ្លាប់បានបោះតង់ប៉ុន្មានដងផងដែរ តែមិនដែលបានឃើញក្ដាមច្រើនយ៉ាងនេះវារចេញមកឡើយ។ ហើយអ្នកស្រី និងសមាជិកគ្រួសារមិនអាចធ្វើអ្វីពួកវាបានឡើយ ដោយគ្រាន់តែព្យាយាមដេញចេញពីកន្លែងទទួលទានអាហារប៉ុណ្ណោះ។

យ៉ាងណាមិញ សាច់របស់ក្ដាមដូងពិតជាមានរសជាតិឆ្ងាញ់យ៉ាងខ្លាំង តែពួកវាស្ថិតនៅក្រោមការការពារក្នុងប្រទេសអូស្ត្រាលី ដែលជាប្រភេទសត្វជិតផុតពូជផងដែរ៕

សូមទស្សនារូបភាពខាងក្រោម៖