កូរ៉េខាងជើងប្រហារជីវិតមន្ដ្រីក្រសួងសេដ្ឋកិច្ច៥នាក់ បន្ទាប់ពីពួកគេបានរិះគន់គោលនយោបាយរបស់លោកគីម ជុងអ៊ុន

កូរ៉េខាងជើង៖ ប្រទេសកូរ៉េខាងជើង បានប្រហារជីវិតបុគ្គលិកក្រសួងសេដ្ឋកិច្ចចំនួន៥នាក់ បន្ទាប់ពីពួកគេបានរិះគន់គោលនយោបាយរបស់មេដឹកនាំផ្ដាច់ការ លោក គីម ជុងអ៊ុន នៅឯពិធីជប់លៀងពិសារអាហារពេលល្ងាចមួយ។ នេះបើតាមចេញផ្សាយរបស់សារព័ត៌មានអង់គ្លេស Daily Mail ថ្ងៃទី១១ ខែកញ្ញា ឆ្នាំ២០២០។

បុគ្គលិកក្រសួងសេដ្ឋកិច្ច និងជាមន្ដ្រីគណបក្សកុម្មុយនីស្ដខាងលើ ត្រូវបានគេបាញ់សម្លាប់កាលពីថ្ងៃទី ៣០ ខែកក្កដា បន្ទាប់ពីពួកគេ បានចូលរួមក្នុងកម្មពិធីជប់លៀងពិសារអាហារពេលល្ងាច ហើយបានពិភាក្សាគ្នាដោយបើកចំហរ អំពីបញ្ហាសេដ្ឋកិច្ចដែលគ្មានស្ថិរភាព និងគោលនយោបាយសេដ្ឋកិច្ចរបស់លោក គីម ដែលធ្វើឲ្យកូរ៉េខាងជើង ក្លាយជាប្រទេសមួយក្នុងចំណោមប្រទេសក្រីក្របំផុតនៅលើពិភពលោក។

យ៉ាងណាមិញ បុរសទាំង៥ គេជឿថា ត្រូវបានកោះហៅឲ្យចូលរួមការប្រជុំមួយ មុនពេលចាប់ខ្លួន រួចបង្ខំឲ្យសារភាព ហើយយកទៅប្រហារជីវិត។

ដោយឡែក បើតាមសារព័ត៌មាន Daily NK បានឲ្យដឹងដែរថា ក្រុមគ្រួសាររបស់ពួកគេ ក៏ត្រូវបានផ្ទេទៅកាន់ពន្ធនាគារ Yodeok  ដែលគេស្គាល់ថា ជាកន្លែងឃុំខ្លួនអ្នកប្រឆាំងនយោបាយដ៏ល្បីឈ្មោះមួយផងដែរ៕