អង្គការ​បារាំង​មួយជ្រើស​សិស្ស​ក្រីក្រ​នៅ​កម្ពុជា​ ជាង​ ៧០នាក់​ក្នុង​មួយ​ឆ្នាំ​ដើម្បី​បង្រៀន​ជំនាញ​ IT ដោយ​ឥត​គិត​ថ្លៃ​

អង្គការប៉ាសឺរ៉ែលនុយមេរិក (PN) គឺជាអង្គការមិនស្វែងរកប្រាក់ចំណេញរបស់​ប្រទេសបារាំងដែលជួយ​ដល់​យុវជនក្រីក្រអាយុក្រោម ២២ឆ្នាំដែលចង់ទទួលបានការបណ្តុះបណ្តាលបន្ថែមនូវជំនាញព័ត៌មានវិទ្យា (IT)។ អង្គការនេះទទួលបានការឧបត្ថម្ភពីមូលនិធិប្រជាជន និងរដ្ឋាភិបាលបារាំង។ ក្នុងឆ្នាំនេះអង្គការខាងលើបានឧបត្ថម្ភដល់និស្សិតក្រីក្រតាមបណ្តាខេត្តនៅកម្ពុជាឲ្យទទួលបានការបណ្តុះបណ្តាល​ជំនាញ​ IT​ ចំនួន ៧៥នាក់។

លោក ហេង ពុធីរៈ មន្ត្រីទំនាក់ទំនងជាន់ខ្ពស់នៃអង្គការអង្គការប៉ាសឺរ៉ែលនុយមេរិក (PN) បានបញ្ជាក់ប្រាប់ Khmerload ថា អង្គការនេះត្រូវបានបង្កើតឡើងក្នុងឆ្នាំ​២០០៥ មានគោលបំណងជួយអប់រំនិស្សិតក្រីក្រឲ្យមាន​ជំនាញ​ដើម្បីអភិវឌ្ឍសមត្ថភាពខ្លួនឯង និងជួយដល់គ្រួសារ។

លោកថា៖ « យើង (PN) ​ និងអង្គការពាក់ព័ន្ធមួយចំនួនទៀតបានអនុវត្តន៍ និងអភិវឌ្ឍន៍គម្រោងតាំងពីឆ្នាំ ២០០៥ ហើយបន្ត​អនុវត្តរហូតដល់បច្ចប្បន្ន​ ដោយផ្តល់ឱកាសឲ្យសិស្សនៅជនបទអាចសិក្សាជំនាញអាយធី។ ហើយមកទល់ឆ្នាំ​២០២០នេះ មាននិស្សិតចំនួន ១៤៨៥នាក់ហើយ ដែលបានបញ្ចប់ការសិក្សាជំនាញ ២ប្រភេទគឺ System & Network Administration (ជំនាញគ្រប់គ្រងប្រព័ន្ធ & បណ្តាញ) និងមួយទៀត Web Programming (ជំនាញសរសេរកម្មវិធីគេហទំព័រ) ពីស្ថាប័នយើង។ ក្នុងនោះខ្ទង់ ៩០% ដែលរកការងារចិញ្ចឹម​ជីវិតបានប្រសើរ និងបានជួយដល់គ្រួសាររបស់គេបាន»។

មន្ត្រីទំនាក់ទំនងរូបនេះថា​ ដើម្បីជ្រើសរើសដោយត្រឹមត្រូវ និងយុត្តិធម៌ដើម្បីទទួលបានសិស្សដែលខ្វះខាតពិតមែននោះ ក្រុមការងារលោកបានចុះផ្សព្វផ្សាយផ្ទាល់នៅវិទ្យាល័យតាមជនបទ។

លោក ពុធីរៈ៖ «យើងត្រូវផ្សព្វផ្សាយផ្ទាល់នៅវិទ្យាល័យតាមជនបទជាមួយអង្គការជាដៃគូនៅតាមបណ្តាខេត្តនានា។ ក្រោយពីសិស្សបានដាក់ពាក្យរួច ពួកគេត្រូវប្រឡង រួចឆ្លងកាត់វគ្គសម្ភាស និងចុងក្រោយទៅមើលដល់ផ្ទះផ្ទាល់​ដើម្បីដឹងពីជីវភាពជាក់ស្តែង។ យ៉ាងណា ក្នុងឆ្នាំនេះដោយសារកូវីដ១៩ ចំណុចខ្លះយើងបានកែប្រែបន្តិចដែរ។ លក្ខខណ្ឌដែលយើងជ្រើស គឺសិស្សក្រីក្រ ហើយចង់រៀនពិតប្រាកដ ពោលគឺមិនមែនគ្រាន់តែមកធ្វើតេស្តចង់​ដឹង​សមត្ថភាពធម្មតាទេ។ ហើយពួកគាត់ត្រូវមានអាយុក្រោម ២២ឆ្នាំ ហើយត្រូវជាប់បាក់ឌុប»។​

លោកបន្ថែមថា៖ «យើងបានចុះតាមខេត្តទៅផ្ទះគាត់ផ្ទាល់។ អ្នកដែលមានជីវភាពយ៉ាប់យឺនហើយប្រឡង​ជាប់លើ​មុខជំនាញដែល​តម្រូវ គឺទទួលបានការបណ្តុះបណ្តាលជំនាញ។ ឆ្នាំសិក្សាសម្រាប់ ២០២០-២០២១នេះ យើង​ជ្រើសយកចំនួន ៧៥នាក់ ដោយពិចារណាលើសិស្សក្នុងចំណោមជាង ២០០នាក់។ យើងជ្រើសមកដោយយុត្តិធម៌​បំផុត ដោយយើងមានការប្រឡងលើមុខវិជ្ជាដូចជា គណិតវិទ្យា តក្កវិទ្យា(ភាពវ័យឆ្លាត) និងភាសាអង់គ្លេស»។

ជាការកត់សម្គាល់ អង្គការប៉ាសឺរ៉ែលនុយមេរិកកម្ពុជា (PNC) និងដៃគូសហការទទួលថវិកាពីគម្រោងមូលនិធិអភិវឌ្ឍន៍​ជំនាញចំនួន ៥៨៤ ០០០ ០០០ រៀល ឬ ១៤៦ ០០០ ដុល្លារអាមេរិក ដើម្បីបណ្តុះបណ្តាលជំនាញព័ត៌មានវិទ្យា​ដល់​យុវជនខ្មែរ ដើម្បីត្រៀមខ្លួនចូលក្នុងទីផ្សារការងារនាពេលដ៏ខ្លីខាងមុខនេះ។

សូមបញ្ជាក់ថា អង្គការប៉ាសឺរ៉ែលនុយមេរិកកម្ពុជា (PNC) គឹជាអង្គការមិនស្វែងរកប្រាក់ចំណេញមួយ​របស់ប្រទេស​បារាំង​ដែលត្រូវបានបង្កើតឡើងក្នុងឆ្នាំ ២០០៥ មានគោលបំណងជួយយុវជនក្រីក្រ ដែលប្រតិបត្តិការនៅអាស៊ីអាគ្នេយ៍​ចំនួន ៣ប្រទេសគឺ កម្ពុជា ហ្វីលីពិន និងវៀតណាម ដើម្បីបណ្តុះបណ្តាលទាំងបច្ចេកទេស និងវិជ្ជាជីវៈនៅក្នុង​ឧស្សាហកម្ម​​ឌីជីថល៕